Իշխան Սաղաթելյանը ներկայացրել է նոր կառավարության անելիքները՝ Փաշինյանի հրաժարականից հետո
«Դիմադրություն» շարժման հանրահավաքի ժամանակ ընդդիմության առաջնորդներից Իշխան Սաղաթելյանը ներկայացրեց այն քայլերը, որոնք պետք է իրականացվեն Նիկոլ Փաշինյանին իշխանությունից հեռացնելուց հետո:
Նա նշեց, որ Արցախն ու Հայաստանի անկախությունը վստանգված է ապազգային ու ապիկար իշխանության պատճառով:
«Այս վիճակը պարտավոր ենք շտկել, հնարավոր է արդյոք, իհարկե, այո, ինչպե՞ս. ելքը անվտանգություն, համերաշխություն, կայունություն, առաջընթաց շղթայով ուժեղ Հայաստանի կերտումն է: Ուժեղ Հայաստան կերտելու համար նախ պետք է հեռացնենք սրանց ու ձևավորվի իշխանություն, որը կապահովի թուրք-ադրբեջանական արտաքին ագրեսիայի զսպումը՝ արդիականացնելով Հայաստանի ու Արցախի միասնական անվտանգության համակարգը, այն պետք է հիմնված լինի ռազմավարական գործընկեր երկրների ներգրավմամբ, հայոց զինված ուժերի վերակառուցմամբ, նոր որակի միջազգային դիվանագիտության հիման վրա: Այդ իշխանությունը պետք է վերահաստատի Արցախի ժողովրդի անվտանգության և ինքնորոշման իրավունքի երաշխավոր լինելու Հայաստանի հանձնառությունը՝ բացառելով Արցախի որևէ կարգավիճակ Ադրբեջանի կազմում», - հայտարարեց Սաղաթելյանը:
Սաղաթելյանի խոսքով՝ Փաշինյանի հեռանալուց հետո ստեղծվելիք նոր կառավարությունը կբացառի Հայաստանի ինքնիշխանության ու տարածքային ամբողջականության հաշվին հաղորդակցության ուղիների ապաշրջափակման անվան տակ միջանցքի տրամադրումը, իսկ ուժի կիրառման սպառնալիքի ներքո Ադրբեջանի հետ սահմանազատում չի իրականացվի։
Խոսելով հայ-թուրքական հարաբերությունների մասին՝ ՀՅԴ-ական գործիչն ընդգծել է, որ նոր կառավարությունը կբացառի որևէ համաձայնություն, որը հարցականի տակ կդնի հայ ժողովրդի հայրենազրկման ու ցեղասպանության իրողությունը։
Իշխան Սաղաթելյանը խոսեց նաև կադրային քաղաքականության մասին՝ նշելով, որ կառավարության անդամները պետք է հստակ չափորոշիչներով ընտրվեն՝ ապահովելով կառավարման համակարգի ճգնաժամի հաղթահարումը:
Սաղաթելյանը կարևորեց Հայաստանում առկա ատելությունն ու պառակտվածությունը վերացնելու անհրաժեշտությունը։Նա ասաց, թե վերացնելու են Հայաստանում խորացվող ատելությունն ու պառակտվածությունը:
«Բացառվելու է անցյալի ու ներկայի արատավոր բարքերը», - ասաց նա։
Իշխան Սաղաթելյանն ասաց, թե այս իշխանությանը հեռացնելուց հետո հրապարկելու են շուրջ 250 քաղաքացիների, պորֆեսիոնալ անհատների անուններ, ովքեր ունեն համապատասխան գիտելիքներ, փորձառություն, հայրենասեր են, ունեն կամք ու վճռականություն երկիրն այս իրավիճակից դուրս բերելու: