Բելառուսում կարող են հանրաքվեի դնել մահապատժի վերացման մասին հարցը
Բելառուսում կարող է հանրաքվե անցկացվել մահապատժի հարցով: «ԲելՏԱ» գործակալության փոխանցմամբ՝ այս մասին երեքշաբթի լրագրողների հետ զրույցում հայտնել է Սահմանադրական հանձնաժողովի նախագահ, Սահմանադրական դատարանի ղեկավար Պյոտր Միկլաշևիչը նախագահի հետ երկրի հիմնական օրենքի փոփոխության մասին առաջարկները քննարկելուց հետո:
«Այսօր Սահմանադրական հանձնաժողովի դիրքորոշումն այն է, որ ներկա պահին ահրաժեշտություն չկա այդ հարցը հանրաքվեի ներկայացնել: Այդ նպատակով կարելի է սոցիալական հանրաքվե անցկացնել հետագայում»,- ասել է վերջինս:
Նրա խոսքով՝ մահապատժի չեղարկման մասին հարցը ներկայում հանրաքվեի ներկայացնելը նպատակահարմար չէ, քանի որ «դա զգացմունքային հարց է», և հատուկ հանրաքվեի կամզակերպման համար նախապատրատական աշխատանք է անհրաժեշտ անել:
Բելառուսը Եվրոպայի միակ երկիրն է, որտեղ մահապատիժ է կիրառվում: Այն վերացնելու մասին հանրաքվե է անցկացվել 1996 թվականին, և քվեարկողների 80,5 տոկոսը կողմ է արտահայտվել պատժամիջոցը պահպանելուն: