Փորձը ցույց է տալիս, որ Փաշինյանի կողմից «փոխշահավետ» անվանվող բոլոր առաջարկներն ի վերջո հանգեցնում են Ադրբեջանի ռազմավարական նպատակների իրականացմանը մեկ քայլով մոտենալուն․ Բագրատ Եսայան
Փորձը ցույց է տալիս, որ Նիկոլ Փաշինյանի կողմից «փոխշահավետ» անվանվող բոլոր առաջարկներն ի վերջո հանգեցնում են Ադրբեջանի ռազմավարական նպատակների իրականացմանը մեկ քայլով մոտենալուն։ Այս մասին Tert.am-ի հետ զրույցում ասաց ՀՅԴ անդամ, «Հայաստան» դաշինքի անդամ Բագրատ Եսայանը՝ անդրադառնալով Նիկոլ Փաշինյանի՝ Սոթք-Խոզնավար սահմանային գծում միջազգային դիտորդներ տեղակայելու վերաբերյալ առաջարկին։
«Ուղիղ եթերներով կարևորագույն, միջազգային բնույթի, գերտերությունների ներգրավմանն ուղղված առաջարկ անելու անմիտ գործելակերպը այդ մարդը, կարծես, նույնիսկ մտադիր չէ դադարեցնել։ Հայաստանն այսօր գտնվում է անվտանգային ուրիշ համակարգում՝ ՀԱՊԿ-ում, որն էլ ունի իր մեխանիզմները, նաև՝ աշխարհաքաղաքական այն տարածքը, որի մեջ ընդգրկված երկրների պաշտպանությունն ու անվտանգությունը պարտավորված է ապահովել՝ ըստ իր կանոնադրության։ Հիմա, ԱԽ ասված խեղկատակ մարմնի նիստի ժամանակ, Նիկոլ Փաշինյանն իրար հակադիր շահեր և վեկտորներ ունեցող անվտանգային համակարգերին առաջարկում է պաշտպանել ՀՀ սահմանները»,- ասաց Եսայանը՝ նշելով, թե հրաժարվում է հավատալ, որ ՀՀ վարչապետի պաշտոնն զբաղեցնող մարդը կարող է այդ աստիճան անմիտ բան ասել։
«Իր կարծիքով էլ՝ շատ խորամանկ քայլ է անում, իբր ամբողջ աշխարհին ներգրավում է՝ անհոդաբաշխ, որևէ բան չենթադրող, որևէ կերպ չհիմնավորվող առաջարկով»,- նշեց նա։
Անդրադառնալով ՀԱՊԿ-ին ուղղված դիմումին՝ Եսայանն ընդգծեց՝ եղել է քննարկում իրականացնելու դիմում, ոչ թե աջակցության։
«Ես չեմ հասկանում եմ՝ ԱԺ «Իմ քայլը» խմբակցության ղեկավար Լիլիթ Մակունցն ինչում էր մեղադրում ՀԱՊԿ-ին։ Ընդհանրապես, այս անմիտների որևէ հայտարարություն դժվար է հասկանալ․ իրենք ՀԱՊԿ-ին չեն դիմել օգնություն տրամադրելու կետով, դիմել են խորհրդակցություն անցկացնելու կետով, հիմա էլ բողոքում են, որ ՀԱՊԿ-ը դանդաղկոտություն է դրսևորում։ Նպատակը, իմ կարծիքով, մեկն է՝ սլաքներն ուղղել դեպի ՌԴ, իրենց ռիսկը չի բավարարում բաց խոսել ՌԴ-ի մասին, և մեղադրում են ՀԱՊԿ-ին»,-ասաց նա՝ ընդգծելով, թե իշխանությունը սահմանները գոնե մի փոքր արժանապատիվ պաշտպանելու համար որևէ քայլ չանելով՝ սկսում է բողոքել ՀԱՊԿ-ից, որ ժամանակին չի արձագանքել, չի օգնել դժվարին իրավիճակում գտնվող անդամ երկրներից մեկին։
«Երբ իրավիճակն ամբողջ տրամաբանության մեջ ես նայում՝ 2018-2021 թթ․, հստակ է, որ փոխվում է ՀՀ-ի աշխարհաքաղաքական կողմնորոշումը․ ՌԴ հետ անվտանգության միասնական համակարգում ընդգրկված երկիրն աստիճանաբար փորձում է ՌԴ-ին մեղադրել ինչ-ինչ մեղքերում և փոխել աշխարհաքաղաքական ուղղվածությունը դեպի Արևմուտք, Թուրքիա, Ադրբեջան։ Նույն հաջողությամբ կարող էր դիմել Թուրքիային՝ ասելով՝ «քո կրտսեր եղբայրն առաջ է գալիս մեր սահմանով, թուրքական դիտորդներ ուղարկիր, թող կանգնեն սահմանին»»,-ասաց նա։
Հարցին էլ՝ ինչպես է տեսնում իրավիճակի հանգուցալուծումը, Եսայանն արձագանքեց․ «Դավաճան իշխանությունը պետք է հեռանա, ուրիշ ելք չկա։ Եթե մենք մեր առաջ խնդիր ենք դնում պահել մեր պետականությունը, եթե 21-րդ դարում այս ազգն իրեն արժանի է համարում պետականություն ունենալ, ուրեմն՝ հունիսի 20-ին պետք է բացառվի իշխանության վերարտադրությունը, դրանից հետո էլ վերջինս պատասխանատվություն կրի իր դավաճանական գործունեության համար»,-ասաց Բագրատ Եսայանը։