Իսպանիայում ձերբակալվել է ավելի քան 100 կոլումբիացու սպանած տղամարդը
Իսպանիայի ազգային ոստիկանությունը Մադրիդում բերման է ենթարկել կոլումբիացու, որն իր երկրում հետախուզվում է ավելի քան 100 սպանություն նախապատրաստելու և կատարելու համար, ասվում է նախարարության հայտարարության մեջ, փոխանցում է «ՌԻԱ Նովոստի»-ն:
Ձերբակալվածը համարվում է կոլումբիական «Կորդիլերա» հանցավոր կազմակերպության ղեկավարը: Այն գործում է ոչ միայն այս երկրում, այլև աշխարհի այլ մասերում, և մասնավորապես, զբաղվում է թմրանյութերի վաճառքով Հարավային Ամերիկայի մի շարք երկրներում, Պանամայում, Միացյալ Նահանգներում, Մեքսիկայում և Կաբո Վերդեում:
Կոլումբիան նրա նկատմամբ երկու անգամ հետախուզում է հայտարարել՝ սպանության, ինչպես նաև զենք պատրաստելու և պահելու համար: Նրա զոհերի թվում է եղել սեփական զոքանչը, որը, ենթադրաբար, սպանվել է կազմակերպության փողերը գողանալու համար:
Տղամարդը Իսպանիա է տեղափոխվել 2015 թվականին՝ նպատակ ունենալով կազմակերպության բջիջներ ստեղծել Իսպանիայում, Բելգիայում և Ֆրանսիայում:
Գործողությանը մասնակցել են Կոլումբիայի և Ինտերպոլի իրավապահ մարմինները: