Հայկ Հեքիմյանին կալանավորելու որոշումն ապօրինի է և ունի որոշ քաղաքականացված տարրեր. փաստաբան
Երևան քաղաքի ընդհանուր իրավասության դատարանը որոշեց բավարարել քննիչի միջնորդությունը, խափանման միջոց ընտրվեց Հայկ Հեքիմյանի նկատմամբ երկու ամիս ժամկետով կալանավորումը: Այս մասին այսօր դատական նիստից հետո լրագրողների հետ զրույցում ասաց Հեքիմյանի փաստաբան Բենիկ Գալստյանը:
Հիշեցնենք, որ ՀՅԴ ԳՄ անդամ Արծվիկ Մինասյանի քրոջ որդուն՝ Հայկ Հեքիմյանին ավելի վաղ Ոստիկանության կենտրոնական բաժնի աշխատակիցները բերման էին ենթարկել և ձերբակալել՝ Քրեական օրենսգրքի 316-րդ հոդվածի 1-ին մասի հատկանիշներով (իշխանության ներկայացուցչի նկատմամբ բռնություն գործադրելը)։
«Ինձ համար անսպասելի էր դատարանի որոշումը, դատարանը գտել է, որ առկա է հիմնավոր կասկած հանցանքի վերաբերյալ: Որպես կալանավորման հիմք՝ նշել էր քննիչի կողմից ներկայացված 3 հիմքերից միայն մեկը՝ խոչընդոտելու ռիսկը։ Չհասցրի որոշմանը մանրամասն ծանոթանալ, բայց պետք է փաստեմ, որ իմ համոզմամբ՝ նշված ակտն ապօրինի է »,- ասաց նա և հավելեց, որ որոշումը հնարավորինս շուտ կբողոքարկի Վերաքննիչ քրեական դատարան և հույս հայտնեց, որ դատարանն օբյեկտիվ որոշում կկայացնի:
Փաստաբանը նշեց, որ չի կարող բացառել այն տարբերակը, որ տեղի ունեցողը քաղաքական հետապնդում է, քանի որ Հայկ Հեքիմյանն Արծվիկ Մինասյանի քրոջ որդին է։ Բացի դրանից, հաջակցություն սյունեցիների ակցիայի ժամանակ նա եղել է ՀՀ գլխավոր դատախազության շենքի դիմաց, մասնակցել է ոստիկանների և քաղաքացիների միջև եղած հրմշտոցին:
Բենիկ Գալստյանը հիշեցրեց, որ հրմշտոցի ժամանակ ոստիկանն է հարվածել Հեքիմյանին: «Հաշվի առնելով թե՛ պարոն Մինասյանի անձը, թե՛ դեպքի հանգամանքները՝ այս ակտն ունի որոշ քաղաքականացված տարրեր»,– ասաց նա: