Այդպես խոսողներին ես կառաջարկեի գնալ Սյունիք, կանգնել Շուռնուխում և խոսել նման կերպ. Աննա Գրիգորյանը՝ սյունեցիների մասին արտահայտվող իմքայլականներին (տեսանյութ)
Իհարկե, այս ամբիոնից կարելի է՝ ասել սյունեցին պետք է այսպիսին լինի, այնպիսին չպետք է լինի, ինչ է, դո՞ւք եք որոշում՝ ինչպիսին պետք է լինի սյունեցին, դո՞ւք եք որոշում՝ ով է խուլիգան, ով՝ չէ։ Այս մասին ազգային ժողովում իր ելույթում ասաց ԱԺ պատգամավոր Աննա Գրիգորյանը՝ անդրադառնալով սյունեցիների վերաբերյալ ելույթներին:
Նրա խոսքով՝ շուրջ երեք տարվա ընթացքում սևի և սպիտակի են բաժանել հասարակությանը և հիմա էլ ներմուծում են նաև Սյունիքի մարզը՝ ասելով, որ կան լավ սյունեցիներ, որոնք մեր կողքին են, և կան ոչ այնքան լավ՝ վատ սյունեցիներ, որոնց հակաէսթետիկ բառապաշարով են սկսում նկարագրել: «Այդպես խոսողներին ես կառաջարկեի գնալ Սյունիք, կանգնել Շուռնուխում և խոսել նման կերպ»,-ասաց նա:
Ըստ նրա՝ մեր երկրում թիվ մեկ խնդիրը պետք է լինի համախմբումը, ոչ թե հերթական անգամ բաժանարար գծեր անցկացնելը: Դահլիճից արձագանքներ հնչեցին, և նա ասաց. «Խնդրում եմ՝ ձեզ պատգամավորին վայել արձագանքներ անել և իմ խոսքը չընդհատել»,-ասաց նա:
Պատգամավորը մեջբերեց «Իմ քայլը» խմբակցությունից Հրաչյա Հակոբյանի հայտարարությունը՝ «Բա պետք է բերման ենթարկվեն, այ տենց ստորացնելով բերման ենթարկվեն»: Աննա Գրիգորյանը նշեց, որ պատգամավորը խախտել է Սահմանադրության մի շարք հոդվածներ: Նա կոչ արեց սյունեցիների մասին խոսել խիստ հարգալից:
Հիշեցնենք, որ սյունեցիների մասին ելույթ է ունեցել «Իմ քայլը» խմբակցության պատգամավոր Վահագն Ալեքսանյանը, որը նշել է, թե Սյունիքում հայհոյանքների հիմնական մասն ուղղված էր Փաշինյանին սատարող քաղաքացիներին: «Այդ մանր ու էժան խուլիգանները փորձում էին սյունեցուն ցույց տալ իրենց համար միակ ընդունելի սյունեցու կերպարը, այն է՝ պատվերով հայհոյող, անբարեկիրթ, անքաղաքավարի, խուլիգան և ամենակարևորը՝ հեշտ կառավարվող»,-ասել է նա: