Մենք դեմ ենք յուրաքանչյուր գործընթացի, որը կարող է վնասել է Հայաստանում լրատվության անկախությանը և ազատությանը. Արման Աբովյանը՝ «Գովազդի մասին» օրենքում փոփոխությունների վերաբերյալ
Յուրաքանչյուր գործընթաց, որը այս կամ այն առումով վերաբերում է լրատվամիջոցներին, պետք է, անպայման, անցնի լրատվամիջոցների կողմից փորձագիտական ուսումնասիրության որոշակի փուլեր: Այս մասին Tert.am-ի հետ զրույցում ասաց «Բարգավաճ Հայաստան» խմբակցության քարտուղար Արման Աբովյանը՝ անդրադառնալով «Գովազդի մասին» ՀՀ օրենքում փոփոխություններ կատարելու մասին օրենքի նախագծին։
«Բուն օրենքին ես չեմ անդրադառնա, այն պատճառով, որ որքանով տեղյակ եմ արդեն իսկ լրատվական դաշտը կոշտ բացասական էր գնահատել: Բացի դրանից, լայն քննարկումներ լրատվական դաշտի հետ չեն եղել, ինչը պետք է լիներ»,-ասաց Արման Աբովյանը:
Նշենք, որ օրենսդրական փոփոխություններով առաջարկվում է լրատվական կայքերում տեղադրված վիճակախաղերի, ինտերնետ շահումով խաղերի և խաղատների գովազդների ցուցադրման գրաֆիկը սահմանափակել, ըստ որի՝ դրանք կարող են հրապարակվել միայն ժամը 22։00-ից մինչև 07։00-ն ընկած ժամանակահատվածում: Առաջին ընթերցմամբ Ազգային ժողովն այն ընդունել է, եթե 2-րդով էլ անցնի, ապա ավելի քան 50 լրատվական կայք կզրկվի իր բյուջեի մոտավորապես 70 տոկոսից:
Հարցին, թե սա ճնշո՞ւմ է լրատվամիջոցների նկատմամբ, Արման Աբովյանն ասաց,որ ավելին չի կարող ասել, քանի որ նախ պետք է ուսումնասիրել առաջին, երկրորդ ընթերցմամբ տեղի ունեցած փոփոխությունները: «Սկզբունքային է, որ յուրաքանչյուր գործընթաց, որը այս կամ այն կերպ կարող է վերաբերել լրատվական միջոցների անկախությանը, անպայման պետք է լրատվական միջոցների կողմից ստանա հավանություն»,-ասաց նա:
Պատգամավորն ասաց, որ ամենակարևորն այն է, որ գործընթացները, որոնք տեղի են ունենում Հայաստանում իշխանության կողմից, դրանք իրողություններից, իրականությունից կտրված են, չեն ներկայացնում հանրության պահանջները և սա ոչ միայն լրատվական ոլորտին է վերաբերում:
Ինչ վերաբերում է «Բարգավաճ Հայաստան» խմբակցության անելիքներին՝ կապված այս օրենքի նախագծի հետ, խմբակցության քարտուղարն ասաց, որ դեռ պետք է նայեն, թե ինչ փոփոխություններ են արել: «Ամեն դեպքում մենք դեմ ենք յուրաքանչյուր գործընթացին, որը կարող է վնասել է Հայաստանում լրատվության անկախությանը և ազատությանը, առհասարակ միայն այս գովազդի հարցը չէ»,-ասաց նա: