Ախալցխայում քաշքշուկ է տեղի ունեցել հիվանդանոցի մոտ. պատվաստումից հետո մահացած բուժքրոջ հարազատները մեղադրում են բժիշկներին (տեսանյութ)
Վրաստանի Ախալցխա քաղաքում քաշքշուկ է տեղի ունեցել «Իմեդի» հիվանդանոցի մոտակայքում, որտեղ հինգշաբթի կորոնավիրուսի դեմ պատվաստվելուց հետո կոմայի մեջ էր ընկել 27-ամյա բուժքույր Մեգի Բակրաձեն:
Ինչպես փոխանցում է Новости-Грузия-ն, ծեծկռտուք է տեղի ունեցել Բակրաձեի հարազատների և հիվանդանոցի աշխատակիցների միջև: Բուժքրոջ ամուսինը հարվածել է բուժհաստատության աշխատակիցներից մեկին: Վերջինս հաձակվել է տղամարդու վրա «Դու սպանել ես կնոջս» խոսքերով:
Նշվում է, որ ծեծկռտուքը դադարեցնել հաջողվել է միայն ոստիկանների միջամտությամբ, որոնք տարածքից դուրս են բերել Բակրաձեի ամուսնուն:
Բուժքրոջ հարազատները կասկածում են, որ հիվանդանոցի բժիշկները կորցրել են իրենց, երբ երիտասարդ բուժքույրն իրեն վատ է զգացել պատվաստումից հետո և չեն կարողացել ժամանակին ճիշտ օգնություն ցույց տալ նրան: Հիվանդանոցում այդ մեղադրանքները հերքում են՝ փաստելով, որ իրենք ադրենալինի անհապաղ ներարկում են արել:
Բակրաձեի հայրը հայտնել է, որ պատվաստումն Ախալցխայում բոլորովին կամավոր հիմունքով չի անցկացվել, և դրանից հրաժարվելու դեպքում բուժաշխատողներին սպառնացել են հեռացնել աշխատանքից:
Ինչպես ավելի վաղ հայտնի էր դարձել, AstraZeneca ընկերության դեղամիջոցով պատվաստումից կես ժամ անց բուժքույրը կոմայի մեջ է ընկել: Տեղում ցուցաբերված բուժօգնությունն արդյունք չի տվել, որից հետո որոշում է կայացվել նրան տեղափոխել Թբիլիսիի Առաջին համալսարանական կլինիկա, սակայն նրան փրկել չի հաջողվել:
Կողմնակի ազդեցության ենթադրյալ պատճառը անաֆիլակտիկ շոկն է նշվում, որը ալերգիկ ռեակցիա է: