Սոչին ցանկանում է երկարաձգել պայմանագիրը Ալեքսանդր Կարապետյանի հետ
Metaratings-ը հայտնում է, որ «Սոչին» ցանկանում է երկարաձգել պայմանագիրը հայ հարձակվող Ալեքսանդր Կարապետյանի հետ:
«Սոչիի» նոր պայմանագիր կկնքեն 32-ամյա հարձակվողի հետ, եթե ակումբը չկարողանա մշտական հիմունքներով ձեռք բերել հարձակվող Ալեքսանդր Կոկորինին, ով մրցաշրջանի երկրորդ հատվածը վարձավճարով է խաղում «Սոչիում»: Կոկորինի պայմանագիրը «Զենիթի» հետ ավարտվում է ընթացիկ մրցաշրջանի ավարտին:
Միևնույն ժամանակ, մեծ հավանականություն կա, որ Կարապետյանը կարող է նոր պայմանագիր կնքել «Սոչիի» հետ և մնալ ակումբում որպես պահեստային հարձակվող, նույնիսկ եթե ակումբը կարողանա համաձայնության գալ Կոկորինի հետ, քանի որ ՌՊԼ-ում հայ ֆուտբոլիստներին որպես լեգիոներ հաշվի չեն առնվելու 2020/21 մրցաշրջանից:
Ինքը՝ Կարապետյանը, ցանկանում է մնալ «Սոչիում» և պայմանագիր կնքել ռուսական ակումբի հետ մինչև 2021 թվականի ամառ: Եվրոպական և Մերձավոր Արևելքի որոշ ակումբներ նույնպես հետաքրքրություն են ցուցաբերում հայ հարձակվողի նկատմամբ:
Կարապետյանը «Սոչիին» է միացել 2019-ի ամռանը: Այս մրցաշրջանում Հայաստանի հավաքականի հարձակվողը «Սոչիի» կազմում անցկացրել է 22 հանդիպում՝ դառնալով երկու գոլի հեղինակ: Transfermarkt-ը Կարապետյանի տրանսֆերային արժեքը գնահատում է 400 հազար եվրո: