Իրաքի վարչապետի պաշտոնակատարը հայտարարել է հրաժարականի մասին և կոչ է արել ընտրություններ անցկացնել
Իրաքի վարչապետի պաշտոնակատար Ադել Աբդ ալ-Մահդին այսօր` մարտի 2-ին հայտարարել է պաշտոնը վերջնականապես լքելու մասին և Թաուֆիկ Ալյաուիի` այդ պաշտոնում խորհրդարանի վստահությունը ստանալու անհաջող փորձից հետո առաջարկել է այս տարվա դեկտեմբերի 4-ին արտահերթ ընտրություններ անցկացնել: Այս մասին տեղեկացնում է РИА Новости գործակալությունը` հղում անելով Իրաքի վարչապետի մամուլի ծառայությանը:
Իրաքի վարչապետ նշանակված Մուհամեդ Թաուֆիկ Ալյաուին մարտի 1-ին հրաժարվել է պաշտոնից, չկարողանալով խորհրդարանից ստանալ անհրաժեշտ աջակցություն՝ նոր կառավարություն ձևավորելու համար:
Իրաքի խորհրդարանը մարտի 1-ին կրկին չի կարողացել քվեարկել պատգամավորների մասնակցության ցածր մակարդակի պատճառով:
Իրաքի նախագահին, խորհրդարանի խոսնակին և պատգամավորներին ուղարկված նամակում Աբդ ալ-Մահդին հիշեցրել է, որ սահմնադրությամբ խորհրդարանի կողմից նոր կառավարության հաստատման վերջնաժամկետը մարտի 2-ն է:
«Սահմանադրական փորձագետների հետ քննարկումներից հետո ես հայտարարում եմ ինքնակամ վարչապետի պաշտոնից հեռանալու որոշման մասին»,-ասված է վարչապետի մամուլի ծառայության կողմից հրապարակված նամակի տեքստից:
«2020թ. դեկտեմբերի 4-ը առաջարկում ենք որպես ընտրությունների անցկացման օր, և առաջարկում ենք ընտրություններից 60 օր առաջ խորհրդարանի ինքնալուծարումը»,-ասված է նամակում:
Աբդ ալ-Մահդին իր պաշտոնին առաջարկել է նշանակել իր տեղակալներից կամ իր կառավարության անդամներից մեկին:
Անցյալ տարվա հոկտեմբերից Իրաքում ցուցարարներն ի սկզբանե իշխանություններից պահանջում էին ուշադրություն դարձնել երիտասարդության շրջանում գործազրկությանը և երկրում առկա կոռուպցիային, այնուհետև սկսեցին հնչել ներկայիս քաղաքական համակարգը փոխելու վերաբերյալ պահանջներ:
Ցուցարարները պահանջում են կառավարության հրաժարականը, ինչպես նաև կենսապայմանների բարելավում, առողջապահության և կրթության ոլորտներում, աշխատաշուկայում առկա խնդիրների լուծում, կոռուպցիայի դեմ պայքար։