ՁԻԱՀ-ի կանխարգելման կենտրոնի և «Նորք» ինֆեկցիոն կլինիկական հիվանդանոցի միավորման թեմայով քննարկմանը Արսեն Թորոսյանի չներկայանալը որակում ենք մասնագետների անտեսում. կենտրոնի բժիշկ-համաճարակաբան
Առողջապահության նախարար Արսեն Թորոսյանի՝ ՁԻԱՀ-ի կանխարգելման հանրապետական կենտրոնի և «Նորք» ինֆեկցիոն կլինիկական հիվանդանոցի միավորման գործընթացի խնդիրների թեմայով ԱԺ առողջապահության և սոցիալական հարցերի մշտական հանձնաժողովի կազմակերպած աշխատանքային քննարկմանը չներկայանալը որակում ենք մասնագետների անտեսում:
Այս մասին քննարկումից հետո Tert.am-ի հետ զրույցում ասաց ՁԻԱՀ-ի կանխարգելման հանրապետական կենտրոնի՝ ազատման դիմում ներկայացրած բժիշկ-համաճարակաբան Վարդան Արզականյանը:
«Քննարկումն այդքան էլ կոնստրուկտիվ չէր: Սպառիչ պատասխաններ չտրվեցին մեր այն բոլոր բարձրացրած հարցերի վերաբերյալ, թե միավորման դեպքում ինչ կշահի պետությունը, ինչ վերլուծություններ են արվել և՛ ֆինանսական, և´ բուժաշխատողների առումով: Իրենք էլ նշեցին, որ չեն արել վերլուծություն: Սկսել են միավորել՝ մտածելով, որ դա արդյունավետ պետք է լինի, իսկ մնացած աշխատանքը թողել են հետո»,-ասաց նա:
Արզականյանը նշեց՝ դեռ նախորդ տարվանից, երբ միավորման մասին խոսակցությունները սկսվել են, ՁԻԱՀ կենտրոնի աշխատակիցները փորձել են քննարկումներ իրականացնել նախարարության հետ, նամակով դիմել են: «Այդպես էլ քննարկում տեղի չունեցավ: Ասում են՝ քննարկումներ են եղել, բայց ում հետ՝ մենք չգիտենք: Դրա համար ստիպված նամակ ուղղեցինք վարչապետին, որն էլի ուղղվեց նախարարություն, հետո՝ ԱԺ»,-ասաց նա:
Վերջինս հարց բարձրացրեց՝ եթե կա արդյունավետ աշխատող կառույց ու կառավարման համակարգ, ինչո՞ւ փոխել այդ համակարգը: «Եթե կառավարման մոդելը փոխում ենք, կանգնում ենք ռիսկերի առաջ»,-նշեց նա:
Անդրադառնալով 86 աշխատակիցների՝ աշխատանքից ազատման դիմումներին, Արզականյանն ասաց, թե նրանք ստիպված են այդ քայլին գնացել: «Մեզ նախարարությունից անտեսում են, հետո էլ ասում, թե քննարկում կլինի միայն միացումից հետո, դրա համար էլ որոշեցինք դիմում գրել, քանի որ չենք ցանկանում մեզ վրա վերցնել միավորման դեպքում առաջացող ռիսկերը»,-ասաց նա:
Վերջինս նշեց՝ շարունակում են պահանջել չեղարկել կենտրոնների միավորման որոշումը, իրականացնել իսկապես մասնագիտական քննարկում, հաշվարկել բոլոր ռիսկերը: