Արցախի նախագահի թեկնածու Արայիկ Հարությունյանն այցելել է Քաշաթաղի շրջանի հարավային թև, որտեղ հանդիպումներ է ունեցել ավելի քան 30 համայնքներում (լուսանկարներ)
Արցախի նախագահի թեկնածու Արայիկ Հարությունյանը մեկնարկած քարոզարշավի ընթացքում այցելել է Քաշաթաղի շրջանի հարավային թև, որտեղ հանդիպումներ է ունեցել ավելի քան 30 համայնքներում և ներկայացրել նախընտրական ծրագրի՝ հենց Քաշաթաղին վերաբերող մասը: Այս մասին հայտարարություն է տարածել Արայիկ Հարությունյանի գրասենյակը:
«Մեծ էր ոգևորությունս, երբ բնակիչներն իրենք սկսեցին խոսել այն հսկայածավալ աշխատանքների մասին, որոնք իրականացվել են այստեղ իմ վարչապետության տարիներին: Ես նրանց խոսքում տեսա հավատ, որ ծնվել է արվածն արձանագրելու գիտակցումից: Սակայն կցանկանայի առանձնացնել ինձ համար ամենակարևորն այցիս ընթացքում. Տիգրանավանում և Աղաձորում ուխտի գնացի հենց այդ հողի համար իրենց կյանքը տված Արցախ Հովսեփյանի և Հակոբ Խաչատրյանի շիրիմներին, իսկ հետո եղա նրանց ընտանիքներում»,- իր խոսքում նշել է Հարությունյանը և հավելել, որ գիտակցում են պատասխանատվության չափն ու կարևորությունը, իսկ ապացույցը հայրենիքի զարգացման իրենց տեսլականն է: