Էլիզաբեթ 2-րդը Վինձորում եկեղեցական պատարագի ժամանելիս չափազանց հոգնաբեկ ու քնատ տեսք է ունեցել. Daily Mail (լուսանկարներ)
Մեծ Բրիտանիայի թագուհի Էլիզաբեթ 2-րդը կիրակի Վինձորում մասնակցել է եկեղեցական պատարագի: Նախքան պատարագին ժամանելը, պապարացիներին հաջողվել է լուսանկարել Մեծ Բրիտանիայի միապետին, որը չափազանց հոգնած ու քնատ տեսք է ունեցել, գրում է Daily Mail-ը:
93-ամյա միապետը, չկարողանալով բաց պահել աչքերը, կարծես փոքր-ինչ ննջել է մեքենայում, գրում է աղբյուրը:
Մեծ Բրիտանիայի թագուհին կրել է լայնեզր վարդագույն գլխարկ, նրբաճաշակ մարգարտե ականջօղեր և տվիդե վերնազգեստ:
Հիշեցնենք, որ օրեր առաջ լրատվամիջոցներում լուրեր էին տարածվել առ այն, որ Մեծ Բրիտանիայի թագուհի Էլիզաբեթ 2-րդը կարծում է, որ արքայազն Հարին և Մեգան Մարքլը թագավորական ընտանիքի ավագ անդամների լիազորությունները վայր դնելուց հետո չեն կարող օգտագործել Royal (թագավորական) բառը:
Ըստ Daily Mail-ի՝ Հարին և Մեգանը տասնյակ հազարավոր ֆունտ ստերլինգ են ծախսել Սասեքսի թագավորական ընտանիքի նոր կայքի վրա, բացի այդ, նրանք քայլեր են ձեռնարկում Sussex Royal, The Foundation of the Duke and Duchess of Sussex անունով նոր բարեգործական կազմակերպություն ստեղծելու ուղղությամբ: Այնուհանդերձ՝ թագուհին և մի շարք այլ բարձրաստիճան պալատական պաշտոնյաներ կարծում են, որ զույգը չի կարողանա օգտագործել Sussex Royal կոչումը:
Ավելի վաղ Բուքինգհեմյան պալատը հայտնել էր, որ արքայազն Հարիի և միապետական ընտանիքի մյուս անդամների միջև համաձայնություն է կնքվել ամուսինների հետագա կարգավիճակի մասին:
Արքայազնի և նրա կնոջ պաշտոնական կարգավիճակի փոփոխություններն ուժի մեջ կմտնեն այս տարվա գարնանից:
