«Երբ չափազանց շատ ես վախենում կորոնավիրուսից». օդանավի ուղևորները, կորոնավիրուսով չվարակվելու համար, ամբողջովին պոլիէթիլենային թաղանթով են պատվել
Ավստրալիական Սիդնեյի քաղաքից Հեմիլթոն կղզի թռչող օդանավի երկու ուղևորները, որպեսզի չվարակվեն Չինաստանում տարածված կորոնավիրուսով ամբողջովին պոլիէթիլենային թաղանթով են պատել իրենց մարմինը, հայտնում է Daily Mail պարբերականը:
Ականատեսներից մեկը նկարահանել է ամբողջովին պոլիէթիլենային թաղանթով և պաշտպանիչ դիմակներով պատված ուղևորներին և տեսանյութը տեղադրել է սոցիալական ցանցերի իր էջում, որը հազարավոր դիտումներ ու հավանումներ է ստացել: Վերջինս հրապարակմանը կից գրել է. «Այս պահին իմ հետևում… երբ չափազանց շատ ես վախենում կորոնավիրուսից»:
Նշենք, որ Ավստրալիայում հաստատվել է նոր կորանվիրուսով վարակման 15 դեպք: Վարակվածները բոլորն էլ ուղղակի կամ անուղղակի կապ են ունեցել համաճարակի կենտրոն Ուհանի քաղաքացիների հետ:
Ինչպես ավելի վաղ նշել էր Tert.am–ը, կորոնավիրուսի նոր տեսակով վարակման հաստատված դեպքերի թիվն աճում է ոչ միայն Չինաստանում, այլև ամբողջ աշխարհում: Ներկայում Չինաստանի սահմաններից դուրս վարակվածների թիվը կազմում է 1011: Աշխարհում, ընդհանուր առմամբ, գրանցվել է վարակման 75 196 դեպք, որից միայն 74 185-ը՝ Չինաստանում:
Չինաստանում կորոնավիրուսի հետևանքով մահացածների թիվը հասել է 2004-ի: Երկրի իշխանություններն անհայտ տեսակի վիրուսի համաճարակի մասին Առողջապահության համաշխարհային կազմակերպությանը տեղյակ էին պահել դեկտեմբերի 31-ին: Համաճարակը բռնկվել է 11 մլն բնակչություն ունեցող Ուհան քաղաքում: