Մյունխենյան բանավեճին պետք էր պատրաստվել բարձր մակարդակով, այնինչ տեսանք, որ Փաշինյանը շատ հարցերում չունի բավարար գիտելիքներ. Մանուկ Սուքիասյան (տեսանյութ)
Նման ֆորմատով առաջին հանդիպմանը պետք էր պատրաստվել բարձր պիլոտաժի մակարդակով, այնինչ իրականում տեսանք, որ Փաշինյանը շատ հարցերում չունի բավարար գիտելիքներ: Այս մասին Tert.am-ի հետ զրույցում ասաց քաղաքագետ, միջազգայնագետ Մանուկ Սուքիասյանը՝ անդրադառնալով Մյունխենում տեղի ունեցած Փաշինյան-Ալիև հանդիպմանը և բանավեճին:
«Ալիևը եկել էր հնչեցնելու թեզեր, որոնք աղերս ունեն ոչ թե բանակցային գործընթացի, այլ այն տեքստի հետ, որը նա մատուցում է իր ներքին լսարանին: Նույն մոտեցումը նա ստիպեց, որ նաև Փաշինյանը կիրառի, այնինչ տվյալ հարթակը շատ ավելի բարենպաստ էր ընկալելի և հասկանալի լինելու համար միջազգայինն ուժային կենտրոններին, ովքեր միջնորդական գործունեություն են իրականացնում: Չեմ կարծում, թե ԱՄՆ-ի, Ռուսաստանի կամ Ֆրանսիայի համար ԼՂ հակամարտության պատմական, իրավական, քաղաքական նյուանսները հանելուկ են, և Փաշինյանը կամ Ալիևը դա պետք է բացահայտեին»,- ասաց նա:
Ըստ Մանուկ Սուքիասյանի՝ բանավեճի ընթացքում Նիկոլ Փաշինյանի հիմնական վրիպումն այն է, որ ԼՂ հակամարտության կարգավորման հարցում նա միջազգային հանրությունից ակնկալում է խաղաղ կարգավորման վերաբերյալ կոչեր:
«Դա անհասկանալի էր, շատ պարզունակ, ոչինչ չտվող հայտարարություն էր: Այն, ինչն ակնկալում է Փաշինյանը, վաղուց արդեն կար: Այլ բան պետք էր ակնկալել, նա պետք է նշեր, որ եթե միջազգային հանրությունը ցանկանում է թույլ չտալ արյունահեղություն շփման գծում, պետք է աներ այսպիսի հայտարարություն, որ հակամարտող կողմերից յուրաքանչյուրը, ով նախահարձակ կլինի և կվերսկսի ռազմական գործողությունները, պետք է պատրաստ լինի, որ դիմացինն ավելի մեծ տարածքային նվաճումներ ունենա, պետք է համակերպվի դրա հետ: Ակնհայտ է, որ մենք չենք հարձակվելու այս պարագայում: Սա կկրեր ընդհանրական բնույթ, բայց զսպաշապիկ կլիներ Ադրբեջանի համար»,- նշեց Մանուկ Սուքիասյանը:
Խաղաղ կարգավորման մասին հայտարարություններից բացի, ըստ նրա՝ Նիկոլ Փաշինյանը միջազգային հանրությունից պետք է ակնկալեր միջադեպերի հետաքննության մեխանիզմների ներդնում:
Սուքիասյանի խոսքով՝ ԵԱՀԿ գործող նախագահի անձնական ներկայացուցիչ Անջեյ Կասպրշիկի, Ադրբեջանում ԱՄՆ դեսպանի հանդիպումները «Լեռնային Ղարաբաղի ադրբեջանական համայնքի» ներկայացուցիչների հետ չեն կարող մտահոգություններ չառաջացնել: «Դրանք Ադրբեջանի ամբիցիաները բավարարելու քայլեր են, բայց այս ամենի վերաբերյալ հայկական կողմի իներտ դիրքը կրկին կապում եմ ԼՂ հակամարտության վերաբերյալ գաղափարական-վերլուծական ասելիք չունենալու հետ: Նիկոլ Փաշինյանը չունի արտաքին քաղաքական հզոր, լուրջ թիմ, որը հնարավորինս օպերատիվ և խորքային կանդրադառնա այս հանդիպումներին: Փաշինյանը արդեն 1.5 տարի է չունի արտաքին քաղաքական հարցերով խորհրդական, մենք չգիտենք, թե ով և ինչ խորհուրդներ է տալիս Փաշինյանին որևիցե բանակցությունից առաջ, նրա գիտելիքները և ինֆորմացիոն բազան ովքեր են ձևավորում»,- նկատեց քաղաքագետը:
Իսկ Զոհրաբ Մնացականյանի նշանակումը ՀՀ արտաքին գործերի նախարարի պաշտոնում, Սուքիասյանի կարծիքով՝ «խայտառակ վրիպում էր և անսկզբունքային քայլ Փաշինյանի կողմից»:
Մանրամասները՝ տեսանյութում: