Առաջին հայացքից կարծում եմ` բողոքարկելու հիմքեր կլինեն․ Արամ Օրբելյանը՝ Արմեն Թավադյանի կալանքի ժամկետը երկարաձգելու վերաբերյալ (տեսանյութ)
Այսօր Երևանի ընդհանուր իրավասության դատարանը բավարարեց «5-րդ ալիք» ՀԸ սեփականատեր Արմեն Թավադյանի գործով քննիչի՝ կալանքի ժամկետը երկարացնելու վերաբերյալ միջնորդությունը, իսկ պաշտպանների` կալանքը գրավով փոխարինելու միջնորդությունը մերժվեց: Նա ևս երկու ամիս կմնա կալանքի տակ: Այս մասին լրագրողների հետ զրույցում ասաց Արմեն Թավադյանի պաշտպան Արամ Օրբելյանը:
«Որոշման տեքստը չի տրամադրվել, մեկ օրվա ընթացքում կտրամադրվի, կծանոթանանք: Առաջին հայացքից կարծում եմ` բողոքարկելու հիմքեր կլինեն: Հիմա չեմ կարող ասել` որոշումը օրինաչափ է, թե չէ, կարող եմ ասել, որ այս պահի դրությամբ` չեմ տեսնում, թե ինչ հիմքով է իրավաչափ մարդուն ևս երկու ամիս կալանքի տակ պահելը»,- ասաց նա:
Նշենք, որ փետրվարի 13-ին ՀՔԾ քննիչը միջնորդություն էր ներկայացրել դատարան, ըստ որի` պահանջում էր երկարացնել Արմեն Թավադյանի կալանքի ժամկետը։ Ավելի վաղ Արմեն Թավադյանի պաշտպան Հովհաննես Խուդոյանն իր պաշտպանյալին անձնական երաշխավորությամբ ազատ արձակելու մասին միջնորդություն էր ներկայացրել Դատախազություն։
Հիշեցնենք, որ դեկտեմբերի 19-ին ոստիկանությունը տեսանյութ էր տարածել՝ ըստ որի Ռոբերտ Քոչարյանի աջակիցներից մեկը Քանաքեռում գտնվող իր գրասենյակ է հրավիրել մարտի 1-ի դեպքերից տուժած անձանցից մեկին ու առաջարկել հրաժարվել տուժողի կարգավիճակից, տված ցուցմունքից և չներկայանալ դատական նիստերին՝ հայտնելով, որ պատրաստ է վճարել այն գումարը, որը պետք է պետությունը տրամադրի որպես դրամական աջակցություն։ Բացի այդ խոստացել է, որ իշխանափոխությունից հետո տուժողին կնշանակեն բարձր պաշտոնի։
Հիշեցնենք՝ ՀՀ երկրորդ նախագահ Ռոբերտ Քոչարյանի ենթադրյալ աջակից Վարուժան Մկրտչյանին մեղադրանք է առաջադրվել ՀՀ քրեական օրենսգրքի 340-րդ հոդվածի 4-րդ մասի 1-ին կետով: Նշված քրեական գործի շրջանակներում նույն հոդվածով նախատեսված հանցավոր արարք կատարելու կասկածանքով դեկտեմբերի 24-ին կալանավորվել է Արմեն Թավադյանը:
Մանրամասները` տեսանյութում