Վարչապետն ուզում է ՍԴ-ն համալրել իր կրնկի տակ եղած դատավորներով, ինչն անընդունելի է. Նաիրա Զոհրաբյան (տեսանյութ)
Հանրաքվեն կարևոր քաղաքական գործընթաց է բացառապես իշխանության համար, մենք շատ ավելի կարևոր ներքին և արտաքին քաղաքական խնդիրներ ունենք, և ՍԴ նախագահ Հրայր Թովմասյանի պաշտոնավարման հարցն առաջնային օրակարգ դարձնելն արդարացված չէ: «Արմնյուզ» ՀԸ «#ՕրաԽնդիր» հաղորդմանը նման կարծիք է հայտնել ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ, ԱԺ «Բարգավաճ Հայաստան» խմբակցության անդամ Նաիրա Զոհրաբյանը:
«Այո»-ի քարոզիչներն ասում են, թե ՍԴ-ն նախկին իշխանության վերջին բաստիոնն է, և հեղափոխությունը պետք է վերջնականապես հաղթի, բայց ես խորապես կասկածում եմ, որ հանրությանը հնարավոր է նման մանիպուլատիվ հնարքներով տանել տեղամասեր: Այս գործընթացն ի սկզբանե գնացել է իրավական լրջագույն խախտումներով: Ավելին, խոր մտահոգություն ունեմ, որ Վենետիկի հանձնաժողովը հերթական անգամ իր վերապահումներն է հայտնելու այս գործընթացի վերաբերյալ»,- ասել է Զոհրաբյանը:
Ըստ պատգամավորի՝ առաջիկա հանրաքվեի լեգիտիմությունը հետագայում կարող է կասկածի տակ դրվել, իսկ ԲՀԿ-ն չի ցանկանում մասնակցել իրավական առումով վիճելի և խոցելի գործընթացի. «Իշխանությունը շատ կուզեր, որ մենք «Ոչ»-ի ճամբարում լինենք, իրենց պետք է հակահերոս ռինգում, որ մեզ էլ նախկին իշխանության մունետիկ հռչակեն: Այսօր Հայաստանում իշխանությունը վիրտուալ իրականություն է ստեղծել և նախկինների հանդեպ ատելությամբ մանիպուլացնում է հանրությանը՝ իրական օրակարգերի փոխարեն կեղծ օրակարգեր առաջ բերելով»:
Զոհրաբյանի կարծիքով՝ հանրաքվեի դրվող հարցն իրականում սև-սպիտակի, հեղափոխական-հակահեղափոխականի բաժանման մասին է. «Հրայր Թովմասյանի և մյուս վեց դատավորների հարցը կա ընդամենը իշխանության օրակարգում, իրենք են նրանց առաջնային թեմա սարքել և պայքարում: Այս հանրաքվեն ՍԴ-ն Նիկոլ Փաշինյանի կրնկի տակ առնելու ուղղությամբ քայլ է: Վարչապետն ուզում է ՍԴ-ն համալրել իր կրնկի տակ եղած դատավորներով, ինչն անընդունելի է»:
Նաիրա Զոհրաբյանի պնդմամբ՝ դատական համակարգը բարեփոխելու միակ ճանապարհը դատարանների գործերին չխառնվելն է, հրահանգներ չտալը, դատավորներին չզանգելը. «Դատավորներն ասում են, որ դատական իշխանության անկախության միակ երաշխիքն իրենց չխանգարելն է: ՍԴ-ն այդ ե՞րբ է խոչընդոտել իշխանության հռչակած այս կամ այն բարեփոխմանը: Իշխանությանը հաշվետու դատական համակարգ չպետք է լինի»:
Նաիրա Զոհրաբյանի կարծիքով՝ ԲՀԿ-ն իր բոյկոտով իշխանությանը հնարավորություն չի տալիս հանրաքվեն սև-սպիտակի դաշտ տեղափոխելու: «Սա չպետք է լինի հեղափոխության վստահության հանրաքվե: Իշխանությանը պետք է հակահերոս, որ հանրության ներքին բնազդները սնեն այդ կերպարով»,- ամփոփել է ԲՀԿ-ական պատգամավորը:
Դավիթ Սարգսյան