«Ցածրամակարդակ իշխանակռվի, տեղին կլինի ասել՝ իշխանության համար սատկած լինելու դրսևորում է». Պարույր Հայրիկյանը՝ ՍԴ շուրջ ծավալվող իրադարձությունների մասին
ԱԺ ներկայացված՝ սահմանադրական օրենքներում փոփոխություններ կատարելու օրենսդրական նախաձեռնությունների, ՍԴ շուրջ տեղի ունեցող իրադարձությունների և այլ հարցերի շուրջ Tert.am-ը զրուցել է ԱԻՄ առաջնորդ Պարույր Հայրիկյանի հետ:
- ՀՀ իշխանությունները նախաձեռնել են սահմանադրական փոփոխությունների գործընթաց։ Սահմանադրության նոր նախագծի վրա կաշխատի 15 անդամից բաղկացած մասնագիտական հանձնաժողով: Դուք էլ էիք հայտ ներկայացրել այդ հանձնաժողովում ընդգրկվելու համար, սակայն Ձեզ չեն ներառել: Ինչպե՞ս կգնահատեք իշխանությունների այս քայլը:
– Ես հայտ չէի ներկայացրել, այլ երկու հասարակական կազմակերպություններ, որոնք ինձ հետ համաձայնեցրել էին իրենց որոշումը։ Եթե կենցաղային լեզվով գնահատենք, ապա դա անպատկառություն է և խնդրի նկատմամբ կամայականության դրսևորում։ Այդ քայլով ակնհայտ է դառնում, որ Նիկոլ Փաշինյանը ոչնչով չի տարբերվում նախորդներից՝ իրենց հագով սահմանադրություններ գրած Լևոն Տեր-Պետրոսյանից, Ռոբերտ Քոչարյանից և Սերժ Սարգսյանից։ Ի դեպ, դա այդ երեքի անփառունակ վախճանի պատճառներից է, ինչն էլ սպասում է այս ինքնասիրահարվածին։ Դրանով իրենք ողջ հանրությանը ցույց տվեցին իրենց մակարդակը և այն, որ իրականում հետին նկատառումներ ունեն և երկրում սահմանադրականության՝ քաղաքացիների իշխանության հաստատումը չէ իրենց գերխնդիրը։
- Իշխող ուժը ցանկանում է փոփոխություններ կատարել «Ազգային ժողովի կանոնակարգ», «Հանրաքվեի մասին» և «Սահմանադրական դատարանի մասին» սահմանադրական օրենքներում: Առաջարկվում է մինչ Սահմանադրության փոփոխությունների ընդունումն Ազգային ժողովի կողմից Սահմանադրական դատարան դիմելը՝ նախագծի սահմանադրականությունը որոշելու նպատակով, դարձնել ոչ պարտադիր, նույնը՝ հանրաքվեի դրվող Սահմանադրության փոփոխությունների մասով: Սա ի՞նչ է նշանակում, ինչպե՞ս կմեկնաբանեք իշխանությունների այս քայլը:
- Անգրագիտություն։ Նման գործընթացներին փոքրիշատե ծանոթ ամեն ոք գիտի, որ Սահմանադրությունը պետք է մեկ ամբողջական փաստաթուղթ լինի և նրա մասերը չպետք է հակասեն իրար։ Փոփոխություններ կատարելիս կարող է այնպես պատահել, որ նոր փոփոխությունները հակասության մեջ գտնվեն ամբողջական Սահմանադրության հետ։ Ո՞վ, եթե ոչ Սահմանադրական դատարանը, իրավունք ունի նախնական գնահատական տալ այդ նուրբ հարցին։ Նույնը վերաբերում է առավել ևս օրենքներին։
- Կխնդրեի անդրադառնալ Սահմանադրական դատարանի շուրջ տեղի ունեցող իրադարձություններին: Արդյո՞ք ՍԴ-ի ու ՍԴ նախագահի հանդեպ իրականացվող քաղաքականությունն օրենքների շրջանակում է:
- Դա ցածրամակարդակ իշխանակռվի, տեղին կլինի ասել՝ իշխանության համար սատկած լինելու դրսևորում է։ Ես ժամանակին և դատախազությանը և ԱԱԾ-ին պաշտոնական գրությամբ իրազեկել էի, որ Սահմանադրական փոփոխությունների հանձնաժողովը ծանր հանցագործություն է կատարել մեր ժողովրդի նկատմամբ՝ քաղաքացիներից թաքցնելով ԱԻՄ-ի տված այլընտրանքը։ Իշխանությունները չուզեցին դրան անդրադառնալ, մինչդեռ դա ամենակարճ և իրավական ճանապարհն էր նախորդ իշխանավորներին ու նրանց լակեյներին իրենց տեղը ցույց տալու։ Բավարարվենք այսքանով։
– Եթե կարելի է մեկնաբանեք Ձեր գրառումներից մեկը, որտեղ ասել էիք՝ «վերադարձիս տոմսը հանձնեցի» և հավելել էիք, որ «տականքներից հեռու մնալն օգտակար է առողջության համար»: Կմանրամասնե՞ք ում և ինչը նկատի ունեք:
- Իմ գրածում ամեն ինչ բավարար ասված է. մի քանի օրից պիտի Երևանում լինեի, բայց չեմ լինի և իսկապես առողջության համար օգտակար է հետին նկատառումներով ապրող ստոր արարածներից հեռու լինելը։ Ինչ վերաբերում է ազնիվ մարդկանց, ես նրանց հետ եմ, իրենք էլ՝ ինձ հետ։