Ես աթոռին կառչած չեմ, բայց ափսոսում եմ․ սա տնօրեն փոխել չէր, սա իմ ձեռքից կյանքիս գործը խլել էր․ չեմ հանդուրժելու․ «Գյումրու մոր և մանկան հիվանդանոց»-ի նախկին տնօրենը՝ մրցույթի մասին
Այսօր «Գյումրու մոր և մանկան ավստրիական հիվանդանոց»-ի նախկին տնօրեն Աշոտ Կուրղինյանն ասուլիս է հրավիրել, որտեղ խոսել է «Գյումրու մոր և մանկան ավստրիական հիվանդանոց» ՓԲԸ-ի տնօրենի թափուր պաշտոնի համար պայքարի և իր՝ մրցույթում չհաղթելու մասին։
Աշոտ Կուրղինյանը նշել է, որ ասուլիս հրավիրելու միտքը հղացել է այն ժամանակ, երբ նա տեղեկացել է Շիրակի մարզպետ Տիգրան Պետրոսյանի որոշման մասին, ըստ որի՝ մրցույթի արդյունքում հաղթող է համարվել «Գյումրու մոր և մանկան ավստրիական հիվանդանոցի» վնասվածքաբան Ժորժիկ Սերոբյանը, ինչն Աշոտ Կուրղինյանի խոսքով՝ սուբյեկտիվ որոշում է։
«Մենք այսօր տեսանք, թե ինչ է նշանակում «հովանավորում»։ Փաստ է՝ ով է նորանշանակ տնօրենը, բայց միայն դա չէ խնդիրը։ Այն եռյակը, որը տխրահռչակ շարժումով, որպես մեկ մարմին, ներկայացավ, բավական հաջող ալիք բռնեց, և իրենց փոքրիկ օրակարգը առաջ տարան։ Նրանք այսօր Գյումրիում կատարում են իրենց ուրույն գործը և փորձում են այն հեղափոխության «սոուսով» համեմել»,- ասել է նա և հավելել, որ այդ ուժը չի հաջողելու, որովհետև մարդիկ միամիտ չեն և ամեն ինչ հասկանում են։
Նա համոզված է, որ այստեղ սուբյեկտիվություն կա, քանի որ մարզպետը վերջին շրջանում այցելել է մարզի բոլոր փոքր և մեծ հիվանդանոցները, սակայն որևէ այց չի իրականացրել «Գյումրու մոր և մանկան ավստրիական հիվանդանոց»։ Նա նշում է, որ համաձայն կլիներ, եթե այցը իրականանար և նույնիսկ դժգոհություններ արձանագրվեին։ Նա երկու դեպք ներկայացրեց, երբ բողոքների պատճառով մարզպետի հետ է հանդիպել, սակայն ըստ նրա՝ բողոքները և պատճառաբանումներն անհիմն են եղել։
Նա նշեց, որ վերջին մեկ տարվա ընթացքում, ինչ Շիրակի մարզպետը Տիգրան Պետրոսյանն է, Կուրղինյանը տեղեկացել է, որ որոշ քննարկումներ և հանդիպումներ են իրականացվել և ըստ նրա՝ արդեն այս մրցույթի արդյունքները նախօրոք պլանավորված քայլերի արդյունք են։
«Ես շատ շնորհակալ եմ, որ մրցույթը բաց է եղել և ուղիղ եթերով հեռարձակվել։ Լսել եմ, որ մարզպետն իր որոշումը վաղը պետք է հիմնավորի և անպայման պետք է իմ և մեր հիվանդանոցի աշխատանքում թերություններ փորձի գտնել։ Չգիտեմ՝ ի՞նչ փաստեր կբերեն վաղը, բայց հնարավոր է, որ դրանք ցածր մակարդակի լինեն։ Ես այս աթոռին կառչած չեմ, բայց ափսոսում եմ, սա տնօրեն փոխել չէր, սա իմ ձեռքից կյանքիս գործը խլել էր, որը ես որևէ կերպ չեմ հանդուրժելու»,- շեշտել է Աշոտ Կուրղինյանը։
Աշոտ Կուրղինյանի ներկայացմամբ՝ կառավարության որոշման համաձայն՝ նոր ծննդատուն պետք է կառուցվի, սակայն մարզպետարանն այդ մասին լռել է, որովհետև ծննդատուն կառուցելու որոշումը եղել է «Գյումրու մոր և մանկան ավստրիական հիվանդանոցի» համար։
Հիշեցնենք, որ «Գյումրու մոր և մանկան ավստրիական հիվանդանոց» ՓԲԸ-ի տնօրենի թափուր պաշտոնի համար թեժ պայքար է ընթացել, որի արդյունքում հիվանդանոցի նախկին տնօրեն Աշոտ Կուրղինյանը 50 միավորից հավաքել է 50-ը, Ժորժիկ Սերոբյանը` 50-ից 48-ը: Մրցութային հանձնաժողովի 7 հոգանոց կազմից 7-ը կողմ են քվեարկել Կուրղինյանին, իսկ Սերոբյանին 7-ից 6-ն է կողմ քվեարկել, այն դեպքում, երբ հանձնաժողովի կազմը ձևավորել է մարզպետը: