Համոզվել ենք, որ մամուլի, ազատ խոսքի հանդեպ իշխանությունից հարգանք սպասել պետք չէ, ուստի վարչապետի՝ երկու հեռուստաընկերությունների վերաբերյալ հայտարարությունը զարմանալի չէր. Արմինե Օհանյան

Կառավարության նիստին վարչապետի հնչեցրած. «ՀՀ-ում առնվազն 2 հեռուստաալիքի լոգոյի տեղը կարելի է գրել «Կոռուպցիա», կամ «Կոռուպցիա գրուպ»»,- հայտարարության թեմայով Tert.am-ը զրուցել է «Հրապարակ» օրաթերթի գլխավոր խմբագիր Արմինե Օհանյանի հետ, որը խորհուրդ տվեց հեռուստատեսության իր գործընկերներին շատ ուշադրություն չդարձնեն այդ հայտարարությանը, անգամ եթե դա վարչապետն է արել, իսկ իշխանությանը խորհուրդ տվեց ձեռնպահ մնալ լրատվամիջոցներին ճնշելու ցանկացած քայլից, որովհետև Հայաստանն այն երկիրը չէ, որտեղ հնարավոր է հաստատել բռնապետական կարգեր:

-Տիկին Օհանյան, երեկ կառավարության նիստին վարչապետ Նիկոլ Փաշինյանը հայտարարեց, որ ՀՀ-ում առնվազն 2 հեռուստաալիքի լոգոյի տեղը կարելի է գրել «Կոռուպցիա» կամ «Կոռուպցիա գրուպ», ըստ Ձեզ, ի՞նչ հայտարարություն էր սա՝ զգուշացո՞ւմ իշխանության համար «ոչ ցանկալի» լրատվամիջոցներին:

-Երբ առաջին անգամ վարչապետը լրատվամիջոցների, մամուլի հասցեին արտահայտություններ թույլ տվեց, այն ժամանակ զարմանքով ընդունեցինք և արձագանքեցինք դրան, բայց անցել է 1.5 տարի, և մենք համոզվել ենք, որ մամուլի, ազատ խոսքի հանդեպ հարգանք, ամեն դեպքում, այս իշխանությունից պետք չէ սպասել, այնպես որ այս հայտարարությունը շատ զարմանալի չէր:

Չէի ցանկանա, որ այն շատ լուրջ արձագանքի արժանանար և հատկապես, հեռուստաընկերություններում աշխատող մեր գործընկերները դրան շատ լուրջ վերաբերվեին ու հետևություն անեին նման հայտարարություններից: Սա ևս, պետք է դիտարկել մյուս բոլոր հայտարարությունների շարքում, որոնք հնչում են ամեն օր ֆեյսբուքից՝ տարբեր լայվերի ժամանակ: Մենք մեր գործն ենք կատարում, պետք է այդպես մտածեն նաև մեր մյուս ընկերներն ու չշեղվեն այն գծից, այն առաքելությունից, որն իրականացնում ենք՝ ի շահ մեր հասարակության: Յուրաքանչյուրն իր կարծիքը կարող է ունենալ մեր կատարած աշխատանքի վերաբերյալ. մեկը կարող է դրական վերաբերվել, մյուսը՝ բացասական, մեկը կարող է համարել, որ դա թշնամություն, դավաճանություն է, երրորդը՝ հակառակը, կարող է մեզ երախտագիտություն, շնորհակալություն հայտնել, որ մենք առողջացնող՝ սանիտարի դեր ենք կատարում հասարակության մեջ, բայց ամենակարևորը մեր համոզմունքն է, որ մենք ճիշտ, լավ և օգտակար գործ ենք կատարում մեր երկրի ու հասարակության համար: Այնպես որ՝ իմ խորհուրդն է մեր գործընկերներին՝ շատ ուշադրություն չդարձնեն նման ելույթներին, անգամ եթե դա վարչապետինն է:

- Դուք խորհուրդ եք տալիս ուշադրություն չդարձնել այդ հայտարարություններին, բայց եղել են դեպքեր, երբ ներխուժել են խմբագրություն, համացանցում տարբեր ֆեյքային հարձակումներ են եղել: Կարծո՞ւմ եք այս հայտարարություններն ու քայլերը վտանգավոր չեն և պետք չէ՞ դրանց ուշադրություն դարձնել:

- Դա էլ նորություն չէ մեր կյանքում: 30 տարվա ընթացքում բազում փորձությունների, ճնշումների, սպառնալիքների, ծեծուջարդի, փակվելու, ֆինանսական ճնշումների և այլնի մեջով ենք անցել և, կարծես՝ դիմակայել ենք, կարողացել պահել ազատ խոսքի մակարդակը, որը ձեռք ենք բերել մեր պայքարի, աշխատանքի ու ջանքերի շնորհիվ: Ես չեմ կարծում, որ դա հեռանկար ունեցող գործընթաց է, եթե վարչապետն է ձեռնարկել, և եթե դրան հաջորդելու են ինչ-որ քայլեր, դրանք շատ արագ մարելու են, մերժվելու և վնասելու են հենց իրենց: Մամուլի դեմ ոչ ոք չի կարող պայքարել և մամուլի դեմ արված յուրաքանչյուր քայլ դուրս է գալու իրենց դեմ: Հիմա էլ ուզում եմ խորհուրդ տալ իշխանություններին, որ ձեռնպահ մնան ցանկացած նման քայլից, որովհետև Հայաստանն այն երկիրը չէ, որտեղ իշխանությունը կարողանա բռնապետական կարգեր սահմանել, ազատ խոսք ճնշել, լրատվամիջոցների նկատմամբ ինչ-որ քայլեր ձեռնարկել, այնպես որ անիմաստ գործողություններ են և ոչ մի արդյունքի չեն հանգեցնելու:

- Եթե անիմաստ գործողություններ են, ապա ո՞րն է նման հայտարարության նպատակը:

- Գիտեք՝ ասում են, որ սատանան ավելի սարսափալի չէ, քան պատկերացնում ենք: Ունենք երիտասարդ լրագրող գործընկերներ, մարդիկ, որոնք հոգեպես կայուն չեն, ճնշվում են, հետևություններ անում և վախենում ու զգուշանում են, ավելի բարդ, սարսափելի հետևանքներ են իրենց մտքում պատկերացնում, քան կարող է իրականում լինել: Այդ զանգվածի վրա է հիմնականում հաշվարկը, որ նաև կվախենան, կզգուշանան և ինչ-որ մարդիկ կնահանջեն, գրաքննության տարբեր դրսևորումներ կկարողանան կիրառել: Դուք խոսում եք վարչապետի հայտարարության մասին, բայց շատ ավելի լավ կլիներ, որ մեր մամուլը, լրատվամիջոցները կենտրոնանային Հեռուստատեսության և ռադիոյի հանձնաժողովի նախագահի վերջին շրջանի պահվածքին: Տիգրան Հակոբյանը ֆեյսբուքի իր էջում արդեն մի քանի անգամ գրառում է կատարում, ինչ-որ մարդկանց հարցազրույցներից տեսակետներ տեղադրում և համարում է, որ դրանք անթույլատրելի են: Մեր թերթին էլ մի խայտառակ հարցազրույց տվեց, որտեղ երևաց այդ հանձնաժողովի ամբողջ նեխածությունը: Պարզ դարձավ, որ նա հեռուստատեսությունների նկատմամբ փորձում է ստանձնել գրաքննիչի դեր: Պետք է դա կանխել, պետք է ասել՝ Տիգրան Հակոբյա՛ն, 2019 թվականին հնարավոր չէ անել այն, ինչ արվեց 2002 թվականին «Ա1+»-ի նկատմամբ, և չես կարող դառնալ Գրիգոր Ամալյան ու մնալ անպատիժ: Մեր մամուլն ու հասարակությունն  արդեն ուրիշ վիճակում է, այլ մակարդակում, ուրիշ տեղ է հայտնվել և 90-ականներին բնորոշ մեթոդները չի կարելի կիրառել այսօր և դրանք լավ տեղ չեն հասցնելու:

- Արդյո՞ք ՀՌՀ նախագահի՝ Ձեր կողմից նշված հայտարարությունները չեն ենթադրում, որ դա հենց քաղաքական իշխանության թողտվության հետևանքն է:

Իհարկե, նշանակում է: Պարզ է, որ մի դեպքում Տիգրան Հակոբյանի բերանով են ասում, մյուս դեպքում՝ անձամբ վարչապետի, երրորդ դեպքում իր մամուլի խոսնակը կասի, չորրորդ դեպքում՝ իրենց տնօրինությամբ գործող լրատվամիջոցներում հոդվածներ կտպեն: Իհարկե, պարզ է, որ դա քաղաքական գիծ է, որն ընտրել է այս իշխանությունը, բայց պետք չէ ո՛չ դրանից վախենալ, ո՛չ դրան լուրջ վերաբերվել: