Այն, որ իշխանության նպատակը ՍԴ մեծամասնությանն իրենով անելն է, վաղուց է փաստ. Ա. Բաբայանը՝ վարչապետի՝ ուժայինների ղեկավարներին ՍԴ դատավորին հեռացնելու համար մեկ շաբաթ ժամանակ տալու լուրերի մասին
Իհարկե, չեմ կարող պնդել կամ հերքել մամուլում տեղ գտած տեղեկությունը, բայց ամեն դեպքում այն, որ քաղաքական իշխանությունը նպատակ ունի ՍԴ մեծամասնությանն իրենով անել, ենթարկեցնել, դա վաղուց հայտնի է: Այս մասին Tert.am-ի հետ զրույցում ասաց իրավապաշտպան Արսեն Բաբայանը՝ անդրադառնալով մամուլում հրապարակված տեղեկությանն առ այն, որ Նիկոլ Փաշինյանը ուժային կառույցների ղեկավարներին մեկ շաբաթ ժամանակ է տվել՝ ՍԴ «անցանկալի» դատավորին հեռացնելու համար:
«ՍԴ շուրջ իշխանության կողմից ծավալած գործընթացները վկայում են հենց դրա մասին: ՍԴ-ի «ճգնաժամ» հասկացությունը հենց նպատակ ուներ, որ ՍԴ դատավորների մեծամասնությունը փոխվի, ինչի հետևանքով էլ կարողանան իրենք իրականցնել իրենց համար ցանկալի սահմանադրական արդարադատություն»,- ասաց նա:
Անդրադառնալով երեկ Հրայր Թովմասյանի սանիկ Նորայր Փանոսյանի ձերբակալմանը՝ նա ասաց, որ դա ճնշում է ՍԴ նախագահի դեմ: «ՍԴ դատավորների վաղ կենսաթոշակի անցնելու օրենքի ստորագրելուն անմիջապես հաջորդեց ՀՔԾ ներկայացուցչի մուտքը ՍԴ, ապա ՍԴ նախագահ Հրայր Թովմասյանին մեղադրանք առաջադրվեց: Հենց այն, որ այս գործողությունները հաջորդեցին օրենքի ստորագրմանը, ինքնին վկայում էր ճնշումների ծավալի մեծացման մասին: Հանրապետության նախագահն էլ չունեցավ անհրաժեշտ ողջամտություն և մասնակիցը դարձավ այս գործընթացներին: Իսկ այս գործընթացները ես կանվանեի ՍԴ լիազորությունների յուրացման փորձ»,- ասաց նա:
Բաբայանը նշեց, որ օրենքի ուժի մեջ մտնելուց հետո երկամսյա ժամկետ է նախատեսված, որի ընթացքում դատավորները կարող են ինքնակամ վաղաժամ կենսաթոշակի անցնելու դիմումներ ներկայացնել: «Ամեն դեպքում կա ժամանակ, այդ օրենքը կօգնի իշխանություններին ազատվել ՍԴ դատավորներից, թե՝ ոչ, ժամանակը ցույց կտա: Այս ճնշումները, հավանաբար, խոսում են այն մասին, որ գործադիր իշխանության ղեկավարն ունի տեղեկություն, որ ամեն դեպքում չկան դատավորներ, որոնք պատրաստվում են օգտվել օրենքով ստեղծված կաշառվելու հնարավորությունից և, հավանաբար, ունենալով տեղեկություն, որ չի իրականանալու այն նպատակը, որը դրվել էր, սկսել են ճնշումները մեծացնել»,- նշեց Բաբայանը:
Նրա խոսքով՝ ՍԴ նախագահ Հրայր Թովմասյանի նկատմամբ իրականացվող ճնշումների ծավալը նաև խոսում է այն մասին, որ նրանք նպատակ ունեն ցույց տալու ՍԴ մյուս դատավորներին, որ այ, եթե ՍԴ նախագահի հանդեպ կարող են այդպիսի գործողություններ իրականացվել, ապա դատավորների հանդեպ ինչեր կարող են անել: «Ես ուզում եմ հավատալ, որ ՍԴ-ում չեն գտնվի դատավորներ, որոնք կվախանեն կամ կանհանգստանան, և կդիմեն այդ քայլին»,- ասաց նա: