Գեներալ Սոլեյմանիի հուղարկավորությունը հետաձգվել է թաղման թափորի ժամանակ առաջացած հրմշտոցի պատճառով
Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սոլեյմանիի հուղարկավորությունը հետաձգվել է թաղման թափորի ժամանակ առաջացած հրմշտոցի պատճառով, որի հետևանքով զոհվել է առնվազն 40 մարդ, ևս 190-ը վիրավորվել է։ Այս մասին հաղորդել է Իրանի պետական հեռուստատեսությունը, գրում է DW-ն։
Իրանական լրատվամիջոցների փոխանցմամբ՝ զոհերի թիվը, հավանաբար, կավելանա։ Ականատեսների հաղորդմամբ, երբ գեներալի դագաղը դանդաղ շարժվել է Քերման քաղաքի փողոցներով, հազարավոր սևազգեստ քաղաքացիների միջև հրմշտոց է սկսվել։
«Ցավոք, հրմշտոցի հետևանքով մեր որոշ հայրենակիցներ վիրավորվել են, իսկ ոմանք սպանվել են թաղման արարողությունների ժամանակ»,- ասել է Իրանի շտապօգնության ղեկավար Փիրհոսեյն Կուլիվանդին։
Հիշեցնենք, որ հունվարի 3-ին Բաղդադում սպանվել է Իրանի իսլամական հեղափոխության պահապանների կորպուսի գեներալ Ղասեմ Սուլեյմանին: Գեներալի սպանությունից հետո Իրանի ԱԳՆ է կանչվել Շվեյցարիայի դեսպան Մարկուս Լեյթները, որը ներկայացնում է ԱՄՆ շահերը Թեհրանում:
Հաղորդվում է նաև, որ ԱՄՆ Զինված ուժերը բարձր մարտունակության են բերվել իրանցի գեներալի սպանությունից հետո: Իրանի գերագույն հոգևոր առաջնորդ Այաթոլլահ Ալի Խամենեին խոստացել է վրեժ լուծել Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սուլեյմանիի սպանության համար:
Ավելի ուշ ԱՄՆ նախագահ Դոնալդ Թրամփը հայտարարել էր, որ հրամայել է սպանել Սուլեյմանիին, որպեսզի կանխի պատերազմը՝ հավելելով, որ գեներալը ամերիկացիների վրա «չարաբաստիկ» հարձակումներ է ծրագրել: