Անդրադարձ չեղավ մարդկանց խոշտանգելուն, քնած սպայի սպանությանը, Սումգայիթին. թույլ պատասխաններ էին, բաց թողնվեց հնարավորությունը. ԼՀԿ և ԲՀԿ պատգամավորները՝ ՀՀ ԱԳ նախարարի հարցազրույցի մասին
ՀՀ արտգործնախարար Զոհրաբ Մնացականյանի հարցազրույցը՝ տրված BBC հեռուստաընկերության HardTalk հաղորդաշարին, չափազանց թույլ էր և հպանցիկ. նման կարծիքի են ՀՀ ԱԺ արտաքին հարաբերությունների մշտական հանձնաժողովի անդամ, ԼՀԿ պատգամավոր Էդմոն Մարուքյանը և ԲՀԿ-ական Տիգրան Ուրիխանյանը:
ԱԺ ԼՀԿ խմբակցության ղեկավար Էդմոն Մարուքյանի խոսքով՝ եթե անվտանգության և աշխարհաքաղաքական ընտրության հարցերում ՀՀ արտգործնախարար Զոհրաբ Մնացականյանի պատասխանը ինչ-որ չափով բավարար կարելի էր համարել, ապա Ղարաբաղի հարցում շատ ասելիք կար, որը չասվեց:
«Արձագանքը չափազանց հպանցիկ էր ու շատ թույլ, բաց թողնվեց տրված հնարավորությունը՝ ներկայացնելու Ադրբեջանի իշխանությունների վարած ահաբեկչական քաղաքականությունը»,-ասաց նա:
Մարուքյանը, խոսելով միայն Արցախի հարցի շուրջ ծավալված երկխոսությունից, նշեց, որ նախարարի պատասխանը չափազանց թույլ էր հաղորդավար Սաքուրի խոսքին այն մասին, թե մեր կողմից ադրբեջանական կողմի վրա հարձակումներ են իրականացվել։
«Նախարարը չանդրադարձավ Սումգայիթին, Ապրիլյան պատերազմի ժամանակ տեղի ունեցած գլխատումներին, խոշտանգված դիակներին, քաղաքացիական անձանց և տարեցների սպանություններին, հպանցիկ խոսեց Գուրգեն Մարգարյանի գլխատման և Սաֆարովի հերոսացման դեպքին, այնինչ այդ ամենի մասին մենք պետք է անդադար բոլոր հարթակներում բարձրաձայնենք՝ Ադրբեջանի գործող իշխանությանը հավասարեցնելով «Իսլամական պետություն» ահաբեկչական կազմակերպության ոճի պատերազմներ վարող պետության մակարդակին»,-ասաց նա:
Ըստ Մարուքյանի՝ անդրադարձ չեղավ մարդկանց խոշտանգելուն, չխոսվեց հայատյաց հռետորաբանության ու պետական մակարդակով քարոզչության մասին:
«Ամբողջ աշխարհը լսում էր, և դրա համար ոչ թե պետք էր արդարանալ, այլ մեղադրել ահաբեկչական երկրին ու նրանց սատարողներին»,-ասաց նա:
ԲՀԿ խմբակցության պատգամավոր Տիգրան Ուրիխանյանը, Tert.am-ի հետ խոսելով նախարարի պատասխաններից, նշեց, որ թույլ փորձ էր՝ ընտրված հարցազրույցի միջոցով հասցնելու իրականությունը համաշխարհային հանրությանը: «Հարցազրույցից հետո առաջանում են մի շարք հարցեր: Զրույցի նախաբանի հետ ունեմ բազմաթիվ անհամաձայնություններ, իսկ արտաքին քաղաքականությանն առնչվող հարցերը, թեև շատ ուղղորդված էին, հստակ նպատակ էին հետապնդում՝ կապակցություններ կորզելու ցանկությամբ, բայց ես չեմ հասկանում՝ ինչու էր վարանում ԱԳ նախարարը՝ մեղադրելու այն սարսափելի իրականության մեջ գտնվող հակառակորդ պետությանը և փորձում կլորացնել սուր անկյունները, այն բոլոր հանցագործությունները, որոնք իրականացվել են Արցախի ժողովրդի նկատմամբ, ՀՀ-ի ժողովրդի նկատմամբ և այն արհամարհանքը և իրավական նորմերի կոպիտ խախտումները, որոնք իրականացվել են այս բոլոր տարիների ընթացքում»,-ասաց նա:
Ըստ Ուրիխանյանի՝ չպետք է նախարարը լռեր, որ Արցախը ոչ միայն պատմական հայկական տարածք է, այլ որ միջազգայի իրավունքի նորմերը հաշվի առնելով է ինքնորոշվել:
«Անկախությունից ի վեր աշխարհին հայտարարվել է և տարվել է քաղաքական ու դիվանագիտական գիծ, որ համաշխարհային իրավունքի նորմերի, ՄԱԿ-ի կողմից հռչակված դրույթին համարժեք Արցախի Հանրապետության ժողովուրդը, չունենալով այլընտրանք, ընդ որում սպառնալիքի տակ գտնվելով և իր գոյության վտանգի տակ լինելու պարագայում օգտագործել է այդ իրավունքը և ինքնորոշվել է: Երեք տասնամյակի ընթացում մարդիկ զրկանքներ են կրել հանուն անկախության... ինչո՞ւ չի երևում այս հարցազրույցում»,-ասաց նա:
Ուրիխանյանը նշեց, թե երբ որ «ուղղորդված հարցազրույց» վարողն ասում է՝ դուք պետք է փոխեք արտաքին վեկտորը կամ պարտավոր եք ընդունել նախկինների ընդունած սխալները, ինչու այստեղ չի ասվում, որ մենք անդամագրված են և աշխատում ու համագործակցում ենք մի ռազմական միջպետական միավորման մեջ, որովհետև չունենք այլընտրանք:
«Չի ասվում, որ մեզ կոտորել են, ու որևէ միջամտություն միջազգային հանրության կողմից չի եղել, երբ մեր պետական սահմանների 80 տոկոսը միակողմանի փակ է, և որևէ այլ միջազգային միավորման կողմից այդ հարցը չի շոշափվում, երբ այսօր էլ կոտորում են խաղաղ բնակչությանը, քնած սպային, դրանց մասին պետք է խոսվեր»,-ասաց նա:
Ինչ վերաբերում է անվտանգության և աշխարհաքաղաքական ընտրությանը վերաբերող հարցերի պատասխաններին, Ուրիխանյանն այստեղ ևս թերի պատասխան է տեսնում:
«Ի՞նչ է նշանակում այդ արդարացումը, որ գտնվում ենք Երևանում, միակողմանի չենք համագործակցում ո´չ մեկի, ո´չ մյուսի հետ: Պետք է ասել՝ առաջարկեք մեր ազգին ու պետությանը շահավետ, ապահով՝ անվտանգային իմաստով, տարբերակներ, և մենք սիրով քննարկենք ու համագործակցենք»,-ասաց նա:
Հիշեցնենք, որ բրիտանական BBC ռադիոկայանի Hard Talk հաղորդաշարի շրջանակում ՀՀ արտաքին գործերի նախարար Զոհրաբ Մնացականյանը, պատասխանելով հաղորդավար Սթիվեն Սակուրի այն հարցին, որ վարչապետի կողմից նշված «Արցախը Հայաստանն է, և վերջ» կարգախոսը հակասում է խաղաղությանը միտված գործընթացին, ասել է. «ՀՀ վարչապետ Նիկոլ Փաշինյանի՝ ՄԱԿ-ում հնչեցրած հայտարարությունը, ըստ որի Լեռնային Ղարաբաղի հիմնախնդրի ցանկացած լուծում պետք է ընդունելի լինի բոլոր կողմերի համար, ենթադրում է, որ Հայաստանը ձգտում է հասնել հակամարտության խաղաղ կարգավորմանը»: