ԿԳՄՍՆ ներկայացրած օրենքի նախագծի որոշ դրույթներ կարող են խոչընդոտել գիտության զարգացումը. նախարարությունը նախ և առաջ պետք է ներկայացներ հայեցակարգ. Արսեն Թավադյան (տեսանյութ)
Իրավաբանական գիտությունների թեկնածու, փաստաբան Արսեն Թավադյանը կարծում է, որ ԿԳՄՍ նախարարության ներկայացրած «Բարձրագույն կրթության և գիտության մասին» օրենքի նախագիծն ունի մի շարք խնդրահարույց դրույթներ: Այս մասին նա նշեց Tert.am-ի հետ զրույցում:
Թավադյանը ընդգծեց, որ սա այն բանի արդյունք է, որ նախարարությունը նախագծի մշակումից առաջ չի մշակել հայեցակարգ, արդյունքում՝ հասկանալի չէ՝ նախարարությունն ու պետությունն ինչ են ցանկանում անել: «Այսպիսի խոշոր բարեփոխում անելուց առաջ պետք է լինի հայեցակարգ, որտեղ նշվում է հարցի վերաբերյալ նախարարության, պետության տեսլականը, նպատակը»,-ասաց Ա. Թավադյանը:
Խոսելով խնդրահարույց դրույթների մասին՝ Թավադյանը նախևառաջ մատնանշեց գիտական մեկ աստիճանի անցում կատարելու առաջարկը, որը, իր կարծիքով, կարող է խոչընդոտել գիտության զարգացումը:
«Հայաստանում այս պահին գործում է գիտական աստիճանակարգման երկու մակարդակ՝ գիտությունների թեկնածու և գիտությունների դոկտոր: Նախագծով առաջարկվում է դա փոխարինել մեկ՝ դոկտորի աստիճանով, ընդ որում՝ հասկանալի չէ՝ դոկտորի կարգավիճակն ինչ է լինելու, մինչև օրենքի ուժի մեջ մտնելն ինչպես է այն հարաբերակցվելու գիտությունների թեկնածուի և գիտությունների դոկտորի կարգավիճակի հետ: Ընդամենը նշվում է, որ գիտությունների թեկնածուի մակարդակը հավասարեցվելու է գիտությունների դոկտորի մակարդակին:
Նախարարությունը ոչ թե պետք է հիմնավորի՝ երկաստիճան համակարգը վատ է գիտության համար, այլ պետք է հիմնավորի, որ պետք է անցնել 1 աստիճան համակարգի: Կարծում եմ՝ սա միջազգային փորձի և պարտավորությունների սխալ ընկալման հետևանք է»,-նկատեց նա:
Թավադյանի խոսքով՝ Հայաստանում գիտությանը տրամադրվող սուղ միջոցների պարագայում գիտական երկաստիճան համակարգը շատերին խրախուսում է զբաղվել գիտական աշխատանքով:
Ինչ վերաբերում է օրենքի նախագծի այն դրույթին, որով հանրային բուհերի հոգաբարձուների խորհուրդը 32 անդամի փոխարեն ունենալու է 12 անդամ, որոնցից 6-ին նշանակում է նախարարը, Թավադյանը նկատեց՝ այս հարցում ևս կարևոր է հայեցակարգը, որով կսահմանվի՝ պետությունն ուզում է, որ բուհում լինի ակադեմիական ազատություն, թե ոչ. «Երկու մոտեցումներն էլ ընդունելի են ու ունեն դրական ու բացասական կողմեր հայաստանյան իրականության համար: Այս կարգավորումը կեղծ շղարշ է ստեղծում, որ կա ակադեմիական ազատություն: Մենք բոլորս գիտենք, որ քիչ են եղել դեպքեր, որ ռեկտոր է դարձել այն մարդը, որին չի առաջարկել նախարարությունը»:
Ավելի մանրամասն՝ տեսանյութում: