Հայաստան-Արցախ միասնության սահմանն անցնում է ՍԴ-ով, իսկ ՍԴ-ն «վերցնելով»՝ Փաշինյանին կհաջողվի կատարել իր պլանը՝ վտանգել Արցախի անվտանգությունը. Արամ Հարությունյան
Իրադարձությունները տեղափոխվեցին ՍԴ, ինչը նշանակում է, որ իշխանությունների կողմից կոմպրոմատային պատերազմը, ճնշումները կլինեն ՍԴ անդամների վրա: Այս մասին Tert.am-ի հետ զրույցում ասաց «Ազգային համաձայնություն» կուսակցության նախագահ Արամ Հարությունյանը`անդրադառնալով ԱԺ «Իմ քայլը» խմբակցության նախաձեռնած Սահմանադրական դատարանի նախագահ Հրայր Թովմասյանի լիազորությունները դադարեցնելու մասին նախագծի` այսօր կայացած քվեարկության արդյունքներին:
Քվեարկությանը մասնակցած 101 պատգամավորներից 98-ը, նշենք, կողմ էին քվեարկվել նախագծին, 1-ը՝ դեմ, 2 քվեաթերթիկ անվավեր էր:
«Ակնհայտ է, որ իշխանությունները ոչնչի առաջ կանգ չեն առնում, իրենց համար նպատակն արդարացնում է միջոցները, և Նիկոլ Փաշինյանը, փաստորեն, հերթական հակասահմանադրական քայլն է անելու`ճնշումներ դատավորների վրա, որոնք, ի դեպ, արդեն սկսվել են»,-ասաց Հարությունյանը:
Վերջինիս խոսքով` Հայաստան-Արցախ միասնության սահմանն անցնում է ՍԴ-ով, իսկ Հրայր Թովմասյանը կանգնած է հայ-ադրբեջանական սահմանին` որպես սահմանապահ:
«Այս դեպքում, եթե Փաշինյանին հաջողվի նաև ՍԴ-ն վերցնել, կհաջողվի կատարել նաև իր պլանը`վտանգել Հայաստանի, Արցախի անվտանգությունը: Նիկոլ Փաշինյանի` Արցախի հարցում նման իրարամերժ հայտարարությունները փաստում են, որ ինքը ոչ միայն ներսում է զբաղված սադրանքով, այլև արտաքին հարաբերություններում: Նա անում է ամեն ինչ, որ Ադրբեջանը բոլոր հիմքերն ունենա հարձակվելու Արցախի վրա` նպատակ ունենալով վերադարձնել մեր կողմից ազատագրված տարածքները: Դրա համար խոչընդոտը ՍԴ-ն է»,-մեկնաբանեց «Ազգային համաձայնություն» կուսակցության նախագահը` նշելով, որ այժմ պետք է համախմբվել և սկսել տևական գործընթաց`պահանջելով Նիկոլ Փաշինյանի հրաժարականը:
Արամ Հարությունյանն անդրադարձավ նաև ԱԺ «Լուսավոր Հայաստան» խմբակցության`Հրայր Թովմասյանի լիազորությունները դադարեցնելու նախագծին կողմ քվեարկելուն` նշելով, որ դա սպասելի էր այնքանով, որ Էդմոն Մարուքյանն ու Նիկոլ Փաշինյանը ժամանակին նույն դաշինքում են եղել` «Ելք»-ում: Հարությանը հիշեցրեց նաև՝ Էդմոն Մարուքյանը թե ՛ նախկին, թե ՛ ներկա իշխանությունների ժամանակ «հարմարվողական» քաղաքականություն է վարել:
«Հույս ունենալ, որ Մարուքյանն ու իր խմբակցությունը երբևէ կդառնան ընդդիմություն, ծիծաղելի է: Հավանական է նաև, որ Էդմոն Մարուքյանը խոստումներ է ստացել Նիկոլ Փաշինյանից, և չի բացառվում` առաջիկայում կառավարության կազմի փոփոխություն լինի, և Մարուքյանի թիմը ստանա նախարարի պորտֆել»,-ամփոփեց Արամ Հարությունյանը: