Վարչապետի կողմից բանակին վերաբերող թվեր հրապարակելը անվտանգության առումով սխալ է. փորձագետ Կ. Վրթանեսյան
Անվտանգության առումով վարչապետի կողմից բանակին վերաբերող թվերի հրապարակումը սխալ է: Այս մասին Tert.am-ի հետ զրույցում ասաց Razm.info մասնագիտացված կայքի համակարգող Կարեն Վրթանեսյանը՝ մտահոգություն հայտնելով ՀՀ վարչապետ Նիկոլ Փաշինյանի ֆեյսբուքյան գրառման կապակցությամբ:
«Նիկոլ Փաշինյանի գրառումը կարդալուց հետո առաջին բանը, որ մտքիս եկավ, այն էր, որ անվտանգության առումով հաջող միտք չէ թվեր հրապարակելը: Իհարկե, այդ գրառման մեջ խոսքը ՀՀ ԶՈւ-ում ծառայող բոլոր ժամկետային զինծառայողների մասին չէ, բայց սովորաբար հետախուզություններն աշխատում են հետևյալ կերպ՝ հակառակորդը առանձին-առանձին հավաքում է թեկուզ ամենամանր տվյալները և այդ տվյալները կարող է հետագայում օգտագործել մեր դեմ»,-ասաց Վրթանեսյանը:
Ըստ նրա՝ նման մանր տվյալները իրար կողքի շարելիս ստացվում է մի ընդհանուր պատկեր, որի միջոցով հնարավոր է շատ կարևոր ինֆորմացիաներ իմանալ:
Հիշեցնենք ՀՀ վարչապետ Նիկոլ Փաշինյանը ֆեյսբուքյան իր էջում գրառում էր կատարել՝ հայտնելով. «Այսօր շատ կարևւոր խորհրդակցություն ունեցանք ժամկետային զինծառայողների կերակրման նոր համակարգի վերաբերյալ: Այս պահին այս համակարգով արդեն իսկ սնվում է շուրջ 7000 ժամկետային զինծառայող՝ 20 զորամասերում»:
Կարեն Վրթանեսյանի համոզմամբ՝ լավ կլինի խուսափել ժամկետային զինծառայողների հետ կապված թվեր հրապարկելուց. «Ընդ որում՝ դեռ մեծ հարց է՝ արդյո՞ք կարիք կա ինչ-որ քննարկման ժամանակ հնչած թվերը միանգամից հանել և հրապարակել: Ինձ համար դա անսովոր ոճ է»,-եզրափակեց նա: