«Սա մարզ է, ոչ թե Գարիկի դուքյանը, որ ինչ ուզի, անի. Նորաշենի ընտրված համայնքապետի լիազորությունները դադարեցնելու հիմքերը պետք է ներկայացվեն». հասարակական գործիչ
Արարատի մարզպետ Գարիկ Սարգսյանի կողմից Նորաշեն համայնքի ղեկավարի ժամանակավոր պաշտոնակատար նշանակված, ավագանու անդամ Արտակ Հարությունյանը ոստիկանների և մարզպետարանի աշխատակիցների հետ միասին բացել է համայնքապետարանի դռները: Այսօր նրանք հանձնում-ընդունում են իրականացնում:
«Համայնքապետարանն իրավունք չունի փակ լինել, մարզպետարանին դիմեցինք, իրենք եկան, միջամտեցին և դռները բացեցին: Փորձեցինք կապ հաստատել աշխատակազմի հետ, նրանց մի մասը մեզ հետ զրուցեց, մյուս մասը հրաժարվեց: Հիմա կփորձենք լուծումներ գտնել, որպեսզի բնականոն կյանքը վերականգնենք մեր գյուղի»,- Tert.am-ի հետ զրույցում ասաց Նորաշեն համայնքի ղեկավարի ԺՊ Արտակ Հարությունյանը:
Հիշեցնենք, որ Արարատի մարզի Նորաշեն համայնքի բնակիչները դժգոհում են, որ համայնքապետ Նորայր Գրիգորյանի լիազորությունները մարզպետի կողմից անօրինական ձևով վայր են դրվել և պահանջում են նրան վերականգնել պաշտոնին: Նախորդ ակցիաների ժամանակ համայնքի բնակիչները նշում էին, որ Արարատի մարզպետ Գարիկ Սարգսյանի որոշման պատճառը քաղաքական է: Ըստ նրանց՝ նախորդ տարի Գարիկ Սարգսյանը համայնքապետին առաջարկել է անդամագրվել «Քաղաքացիական պայմանագիր» կուսակցությանը, սակայն նա հրաժարվել է, ինչն էլ նրան աշխատանքից ազատելու պատճառ է դարձել:
Մարզպետ Գարիկ Սարգսյանը Նորայր Գրիգորյանի՝ արձակուրդ լինելու ընթացքում որոշել է կասեցնել վերջինիս լիազորությունները և ավագանու գործող անդամներից Արտակ Հարությունյանին նշանակել ժամանակավոր պաշտոնակատար: Նախկին համայնքապետը մարզպետի այս որոշման մասին չի ծանուցվել։
Նորաշեն համայնքի ղեկավարի ԺՊ Արտակ Հարությունյանի խոսքով՝ ավագանու անդամները հիմնավոր փաստեր ենք ներկայացրել համայնքապետի լիազորությունները դադարեցնելու արձանագրությունում:
«Մարզում շատ քիչ, մոտ 30 հոգի «Քաղաքացիական պայմանագիր» կուսակցության անդամ կա, ցուցակի մեջ ոչ մի համայնքապետ չկա: Ես չեմ հասկանում՝ Նորայր Գրիգորյանն ի՞նչ ֆենոմեն էր, որ իր կարիքը ՔՊ-ն այդպես ուներ, ես դա չեմ հասկանում»,- ասաց Արտակ Հարությունյանը:
Լիազորությունները դադարեցված Նորայր Գրիգորյանի աջակիցները հայտարարում էին, որ Նորաշեն համայնքի ավագանու 5 անդամներ «գյուղի դաշտում» ավագանու նիստ են անցկացրել, ստորագրել արձանագրության տակ և փոխանցել մարզպետարան: Արտակ Հարությունյանը, ըստ էության, չի հերքում այս փաստը։
«Մենք փորձել ենք այդ նիստն անցկացնել համայնքապետարանում, բայց խոչընդոտվել է: Ավագանու նիստը հրավիրողը տեղն ու ժամն ինքն է որոշում, կարևորը՝ պատշաճ վայր է, թե դա դաշտ է կամ ինչ է, կարևոր չէ: Եթե մարդիկ կան, որ համաձայն չեն ավագանու որոշման հետ, թող վիճարկեն»,- ասաց նա:
Արտակ Հարությունյանը դեռ չի որոշել՝ առաջադրելու է իր թեկնածությունը Նորաշենի համայնքապետի նոր ընտրություններում, թե ոչ: Նոր ընտրություններ, հավանաբար, տեղի կունենան 2 ամսից. «Ես պատրաստված չեմ եղել, դրան չեմ գնացել ի սկզբանե: Կոնկրետ հիմա չեմ կարող այդ հարցին պատասխանել, ժամանակը ցույց կտա»:
Հասարակական գործիչ Բաբկեն Հարությունյանը տեղեկացրեց, որ նախօրեին կառավարության դիմաց Նորայր Գրիգորյանի լիազորությունները վերականգնելու պահանջով բողոքի ակցիայից հետո Արարատի մարզի բնակիչներ Ալինա Մախսուդյանը, Վարդան Մինասյանը և ինքը հանդիպել են Տարածքային կառավարման և ենթակառուցվածքների նախարարության և Կառավարության 2-ական ներկայացուցիչների հետ: Որոշվել էր, որ տարածքային կառավարման նախարարությունը Նորաշեն համայնքի ղեկավարի ժամանակավոր պաշտոնակատար կնշանակի համայնքի ղեկավարի տեղակալ Միսակ Ստեփանյանին:
«Հիմա իրավիճակը, որպեսզի մի քիչ հանդարտվեր, նման պայմանավորվածություն էր ձեռք բերվել: Ուզում եմ արձանագրել, որ խախտվել է ձեռք բերված պայմանավորվածությունը, կամ էլ Գարիկ Սարգսյանին ընդհանրապես հետաքրքիր չէ իր ղեկավար նախարարի խոսքը: Ստեղծված իրավիճակում այլ գնահատական տալ չեմ կարող: Այստեղ ամբողջ խնդիրն այն է, որ երբ կառավարությունը դադարեցնում է ընտրված համայնքապետի լիազորությունները, պետք է ներկայացնել դրա հիմքերը: Ամբողջ խնդիրը դա է, որ այստեղ չկան հիմքեր: Հոգ բարդակ չէ, սա երկիր է, մարզ է, ոչ թե Գարիկի դուքյանը, որ ինչ ուզի, անի»,- ասաց Բաբկեն Հարությունյանը:
Մանրամասները՝ տեսանյութում: