Ցցեր, կոկորդիլոսներ, օձեր. Թրամփի ամենաանհավանական առաջարկները՝ Մեքսիկայի հետ սահմանն ապօրինի հատել փորձող ներգաղթյալներին կանգնեցնելու համար (լուսանկարներ)
ԱՄՆ նախագահ Դոնալդ Թրամփն իր վաղեմի՝ Մեքսիկայի հետ սահմանին անօրինական ներգաղթյալների հոսքը կանգնեցնելու երազանքն ի կատար ածելու համար տարիներ շարունակ հանդես է եկել անհավանական և անիրատեսական մի շարք առաջարկներով, գրում է Insider-ը:
Թրամփի առաջարկներից շատերը, ինչպես գրում է աղբյուրը, անօրինական են, մյուսները՝ չափազանց թանկարժեք ու անիրատեսական:
Վերջին շրջանում Սպիտակ տան ղեկավարի «առաջարկների տեղատարափը» պայմանավորված է 2019 թվականին Մեքսիկայի սահմանը հատած ներգաղթյալների ամենաբարձր թվով: 2019 թվականի գարնանը սահմանին ամսական ավելի քան 100 հազար ներգաղթյալ է ձերբակալվել:
Ստորև ներկայացված են Մեքսիկայի հետ սահմանին անօրինական ներգաղթյալների հոսքը կանգնեցնելու Թրամփի ամենաանհավանական և անիրատեսական առաջարկները.
Կրակել Մեքսիկայի սահմանն ապօրինի հատել փորձող ներգաղթյալների ոտքերին
Բոլորովին վերջերս The New York Times պարբերականը նյութ էր հրապարակել առ այն, որ Դոնալդ Թրամփը դեռ մարտին Օվալաձև աշխատասենյակում հանդիպումներից մեկի ժամանակ առաջ է քաշել սահմանը հատելու պահին անօրինական ներգաղթյալների ոտքերին կրակ բացելու գաղափարը: Ըստ հաղորդման՝ ներկաները, որոնց թվում են եղել նաև պետքարտուղար Մայք Պոմպեոն, խորհրդականներ Սթիվեն Միլլերը և Ջարեդ Քուշները, մերժել են նախագահի այդ առաջարկը՝ պատճառաբանելով դրա հակասահմանադրական լինելը:
Նման հայտարարությամբ Սպիտակ տան ղեկավարը հանդես է եկել նաև 2018 թվականին՝ ասելով, որ ԱՄՆ զինվորականները կարող են կրակ բացել իրենց ուղղությամբ քարեր նետող ներգաղթյալների վրա:
«Մենք դա (քարը) կդիտարկենք որպես հրազեն, որովհետև առանձնապես մեծ տարբերություն չկա»,- 2018 թվականի նոյեմբերին ասել էր Թրամփը:
Վտանգավոր օձեր ու կոկորդիլոսներ՝ Մեքսիկայի հետ սահմանին փորված փոսում
The New York Times պարբերականի հաղորդմամբ՝ մասնավոր զրույցներում Թրամփը հանդես է եկել ներգաղթյալների նկատմամբ անսովոր միջոցներ կիրառելու օգտին, որոնց թվում է վտանգավոր օձերով ու կոկորդիլոսներով փոսի գաղափարը: Թրամփն առաջարկել է սահմանին փոս փորել և այն լցնել կոկորդիլոսներով և օձերով, նույնիսկ հետաքրքրվել է նման նախագծի մոտավոր արժեքով։
Ավելի ուշ Սպիտակ տան ղեկավարը հերքել է այս մասին լուրերը:
Սրածայր ցցերով կամ «էլեկտրահարող» պատ
Անցած դեկտեմբերին Թրամփը Twitter-ում հրապարակել էր պատի նախագծի լուսանկարը՝ հայտնելով, որ այն «միանգամայն արդյունավետ կլինի, բացի այդ՝ գեղեցիկ է»:
Բացի այդ, ԱՄՆ նախագահը մարտ ամսին հանդես էր եկել Մեքսիկայի հետ սահմանին կառուցվող պատը «էլեկտրահարող» դարձնելու մտահղացմամբ:
Սև և «կենդանի» պատ
ԱՄՆ նախագահ Դոնալդ Թրամփը մայիսի 23-ին Ներքին անվտանգության և բանակային կորպուսի նախարարության հետ հանդիպման ժամանակ նրանց հրահանգել է պատը սև ներկել, հաղորդում է The Washington Post-ը:
Գաղափարն այն է, որ անապատում սև ծածկույթը կկլանի կիզիչ արևի ճառագայթները և այն անհնար կլինի բարձրանալ:
Անցյալ գարնանը Թրամփը նաև ցանկություն էր հայտնել, որ ԱՄՆ-ի զինվորականները և սահմանային պարեկային գործակալները միավորվեն և «կենդանի պատ» կազմեն՝ անօրինական ներգաղթյալների հոսքը դադարեցնելու նպատակով:
ԱՄՆ-Մեքսիկա սահմանի երկարությունն ավելի քան 1900 մղոն է, ուստի Թրամփի օգնականները նրա այդ առաջարկն ավելի քան անիրատեսական են համարել: