Ինչո՞ւ է Երևանի քաղաքապետարանը հիմա խզում «Սանիթեք»-ի հետ պայմանագիրը, երբ նախկինում ասում էր՝ դրա համար ընթացակարգեր կան. խոսնակի պարզաբանումը
2019-ի ապրիլի 18-ին Կառավարության նիստում անդրադառնալով Երևանի աղբահանության խնդրին և Երևանի աղբահանությամբ զբաղվող նոր ընկերության մրցույթի անցկացմանը` Երևանի քաղաքապետ Հայկ Մարությանը նշել էր, որ նախ պետք է խզել «Սանիթեք»-ի հետ պայմանագիրը, իսկ դրա համար ընթացակարգեր կան, որոնք չպահպանելու դեպքում «Սանիթեք» ընկերությունը դատարանում կպահանջի իր առաջիկա 10 տարիների շահույթը, որը ստանալու էր այդ ընթացքում: Երեկ Երևանի քաղաքապետը հայտարարեց, որ միակողմի խզում է «Սանիթեքի» հետ պայմանագիրը:
Tert.am-ը քաղաքապետարանից պարզաբանում խնդրեց այն մասին, թե եթե հնարավոր էր խզել պայմանագիրը, ինչու դա ավելի վաղ չէր արվում և խոսվում էր անհնարինության ու ընթացակարգերի, ինչպես նաև դատարան դիմելու վտանգի մասին:
Երևանի քաղաքապետի մամուլի քարտուղար Հակոբ Կարապետյանը Tert.am-ի հետ զրույցում ասաց, որ պայմանագիրը խզվել է ճիշտ այն ժամանակ, երբ անհրաժեշտ էր և հնարավոր: Նա նաև նշեց` պայմանագրի խզումը աղբահանության միակ օպերատորի հետ հեշտ գործ չէ` բազմաթիվ իմաստներով:
«Մի կողմից` ուղիղ այն պահից, երբ խզվում է պայմանագիրը, այդ ընկերությունը դադարելու է կատարել աղբահանությայն գործը, և այդ դեպքում պետք է հասկանալ` ով է կատարելու: Իսկ աղբահանությունն այն ոլորտն է, որ 2-3 օր, ամենաշատը` 1 շաբաթ անգործության դեպքում չափազանց ծանր դրություն է ստեղծվում: Պատկերացնենք, որ ապրիլի առաջին օրերին, երբ արդեն «Սանիթեքը» լուրջ ձախողումներ էր ունենում, պայմանագիրը խզվեր, իսկ այդ ժամանակ քաղաքը ոչ մի ռեսուրս չուներ` աղբահանության իրականացնելու»,- մեկնաբանեց մամուլի քարտուղարը:
«Օգոստոսին, ինչպես գիտենք, «Սանիթեքն» ինքն արդեն հրաժարվեց կատարել իր պարտականությունները, ըստ էության` միակողմանիորեն հրաժարվելով պայմանագրից»,-ասաց Հակոբ Կարապետյանը:
Հարցին` այդ դեպքում ինչո՞ւ Երևանի քաղաքապետարանը ևս օգոստոսին չխզեց պայմանագիրը, Հակոբ Կարապետյանը պատասխանեց, որ մինչ պայմանագրի խզումը Երևանի քաղաքապետարանի կողմից կատարվել են որոշակի ուսումնասիրություններ:
«Քաղաքապետը որոշել է ստուգել «Սանիթեքի» կողմից պայմանագրի բոլոր կետերի կատարման հանգամանքները, օրինակ` արդյո՞ք ի սկզբանե պայմանագրի կնքման մրցույթի ընթացակարգը, որի միջոցով «Սանիթեքը» հնարավորություն էր ստացել զբաղվել աղբահանությամբ, օրինական էր: Հուլիսից սկսած քաղաքապետարանի աշխատակիցները սկսել են մոնիթորինգ, ուսումնասիրություն, որն ավարտվել և ամփոփվել է սեպտեմբերի վերջին: Այդ ուսումնասիրության արդյունքներն էլ վերջնականապես հիմք են տվել քաղաքապետին` կայացնել այս որոշումը»,- մեկնաբանեց Հակոբ Կարապետյանը:
Երևանի քաղաքապետարանի մամուլի խոսնակը չմեկնաբանեց «Սանիթեք»-ի կողմից արբիտրաժային դատարան դիմելու որոշումը` նշելով միայն, որ Երևանի քաղաքապետարանի գործողությունները բխել են անհրաժեշտությունից և օրինականությունից: