Ստամբուլյան կոնվենցիան ամբողջովին դրսից ներմուծվող և ավելի շատ պարտադրվող փաստաթուղթ է. ՀՍԱԿ (տեսանյութ)
Ստամբուլյան կոնվենցիան քաղաքական օրակարգ չի կարող մտնել, չնայած այն արդեն հանրային օրակարգի մաս է կազմում: Tert.am-ի հետ զրույցում ասաց Հանուն սոցիալական արդարության կուսակցության նախագահ Արման Ղուկասյանը:
Նրա խոսքով՝ այդ կոնվենցիայի մասին դրական են արտահայտվել արդարադատության նախարարը, փոխնախարարները, «Իմ քայլը» դաշինքի որոշ պատգամավորներ, նաև իշխանության որոշ ներկայացուցիչներ: Այս պահին Կոնվենցիան ուղարկվել է Վենետիկի հանձնաժողով, և հոկտեմբերի վերջին սպասվում է եզրակացությունը:
«Շատ մարդիկ ասում են, որ կոնվենցիայի վավերացումը մյուս տարի է նախատեսվում, ինչ իմաստ ունի այժմ երթ անցկացնել: Մենք այս երթն անվանում ենք իրազեկման և զգոնության երթ, այն ուղղված է թե՛ մեր հասարակությանը, որ զգոն լինեն, թե՛ մեր կառավարությանը, թե՛ միջազգային կազմակերպություններին: Կոնվենցիան առաջին հերթին հակասում է մեր Սահմանադրությանը, և միջազգային պրակտիկայում կան երկրներ, որ հակասահմանադրական են ճանաչել այս կոնվենցիան՝ օրինակ Բուլղարիան: Այդ կոնվենցիան հակասում է նաև մեր Սահմանադրությանը, քանի որ այնտեղ նշված է, որ ընտանիքը զույգերի միություն է, իսկ մեր Սահմանադրությամբ ամրագրված է, որ ընտանիքը տղամարդու և կնոջ միություն է, և դա արդեն վկայում է այն մասին, որ սա հակասահմանադրական փաստաթուղթ է»,- ասաց Արման Ղուկասյանը:
Նա հավելեց՝ իրենք համարում են, որ Ստամբուլյան կոնվենցիան այլասերվածության քարոզչություն է իրականացնում: Նա կարծում է, որ եթե պետք է պաշտպանել կանանց իրավունքները և ընտանիքում կանխարգելել բռնությունները, ապա դա անհրաժեշտ է անել մեր օրենսդրության շրջանակներում, ոչ թե ընդունենք միջազգային լղոզված փաստաթուղթ, որտեղ կանանց իրավունքների պաշտպանության ֆոնի տակ պաշտպանում են իրենց համար անընդունելի մարդկանց խմբերի իրավունքներ:
Հանուն սոցիալական արդարության կուսակցության փոխնախագահ Ծովինար Կոստանյանն էլ ասաց, որ եթե ընթերցենք կոնվենցիան, ապա կտեսնենք, որ բացի կանանց իրավունքներից, շատ հստակ նշվում են նաև ԼԳԲՏ համայնքի իրավունքները, և այնտեղ կան այնպիսի հասկացություններ, ինչպիսիք են գենդերային ինքնությունը և այլն:
«Կանանց իրավունքների քողի ներքո փորձում են հրամցնել այլ կատեգորիաներ և այլ դրույթներ բերել հայկական հասարակություն: Ստամբուլյան կոնվենցիան ամբողջովին դրսից ներմուծվող և ավելի շատ պարտադրվող փաստաթուղթ է, և վավերացման դեպքում մենք ընդունում ենք բոլոր կետերը. մասնակի վավերացնել պարզապես չենք կարող»,- ասաց կուսակցության փոխնախագահը:
Նրա խոսքով՝ իրենց նպատակն այն է, որ Ստամբուլյան կոնվենցիայի քննարկումը հանվի հանրային օրակարգից և չմտնի քաղաքական օրակարգ:
«Եթե վավերացվի կոնվենցիան, ուրեմն դուռ է բացվում ԼԳԲՏ համայնքի ներկայացուցիչների ամուսնության, նրանց կողմից երեխաների որդեգրման համար: Կոնվենցիայում նշվում է նաև, որ եթե տվյալ հասարակությունն ունի որոշակի արժեքներ, հայացքներ, որոնք հակասում են կոնվենցիայի կետերին, ապա պետք է աշխատանք տարվի այդ հասարակության հետ, որպեսզի այդ հայացքները փոփոխվեն: Կոնվենցիան նախատեսում է աշխատանք նաև կրթական հաստատություններում՝ դպրոցներում, գուցե մանկապարտեզներում, համալսարաններում, կոնկրետ վայր նշված չէ: Այսինքն՝ կոնվեցիայի վտանգավոր կետերից մեկը այդ կրթական բաղադրիչն է»,-ասաց Ծովինար Կոստանյանը:
Երթի մասնակիցները պահանջագիր ներկայացրին Նիկոլ Փաշինյանին և նրա կառավարությանը և Հայաստանում Եվրոպական խորհրդի գրասենյակի ղեկավարին, որպեսզի չճնշեն Հայաստանին, քանի որ իրենք կարծում են, որ Հայաստանը ճնշումների է ենթարկվում: