Փակ սահմանները, շրջափակումները ամբողջ Եվրասիական տարածաշրջանի խնդիրներն են, քանի որ բաժանարար գծերի պայմաններում անհնար է լիարժեք տնտեսական զարգացում. Արարատ Միրզոյան
ՀՀ ԱԺ նախագահ Արարատ Միրզոյանը Եվրասիայի երկրների խորհրդարանների խոսնակների չորրորդ համաժողովում հանդես է եկել ելույթով: Այս մասին հայտնում է Ազգային ժողովի լրատվության և հանրության հետ կապերի վարչությունը:
ԱԺ նախագահի ելույթը ներկայացնում ենք ստորև.
«Հարգելի պարոն Վոլոդին, հարգելի պարոն Մուն Հի Սան, հարգելի պարոն Նիգմատուլին, հարգելի գործընկերներ, տիկնայք և պարոնայք, ինձ համար մեծ պատիվ է մասնակցել Եվրասիական երկրների խորհրդարանների խոսնակների 4-րդ համաժողովին: Նախ և առաջ ուզում եմ շնորհակալություն հայտնել Ռուսաստանի և Կորեայի խորհրդարանների ղեկավարներին՝ համաժողովը նախաձեռնելու համար, ինչպես նաև հատուկ շնորհակալություն հայտնել պարոն Նիգմատուլինին, ղազախական կողմին՝ ջերմ ընդունելության և ավանդական հյուրընկալության, ինչպես նաև միջոցառման հիանալի կազմակերպման համար:
Հարգելի գործընկերներ, այս ձևաչափը եզակի է բազմաթիվ առումներով. նախ` աշխարհագրական ծածկույթով: Այս հարթակը մեզ հնարավորություն է տալիս քննարկելու ամենամեծ մայրցամաքի օրենսդիր մարմինների միջև համագործակցության հեռանկարները, ինչն իր հերթին նպաստում է ինտեգրացիոն նախագծերի հաջող զարգացմանը, առևտրատնտեսական կապերի ընդլայնմանը:
Պատմությունն ապացուցում է, որ սերտ համագործակցությունն ու մարդասիրական հարաբերությունները մարդկության համար խաղաղության և առաջընթացի հիմքն են:
Գաղտնիք չեմ բացահայտի, եթե նշեմ այն գլոբալ մարտահրավերները, որոնք առկա են ինչպես ամբողջ աշխարհում, այնպես էլ եվրասիական տարածքում: Եվ այս խնդիրների լուծման բանալին շատ պարզ է և, միևնույն ժամանակ, շատ բարդ՝ երկխոսություն, վստահություն և գործընկերություն: Հենց այս բանաձևն է այն խնդիրները լուծելու ճանապարհը, որով մենք, հարգելի գործընկերներ, բախվում ենք բոլորս միասին և, բնականաբար, միայն համատեղ ջանքերով կկարողանանք լուծել այդ խնդիրները: Գլոբալ քաղաքականությունը շատ նման է մեգապոլիսի բազմակողմանի ավտոմոբիլային երթևեկությանը, և միայն համակարգված գործողությունները թույլ կտան վարորդներին խուսափելու դժբախտ պատահարներից և հասնելու իրենց նպատակակետին՝ արտակարգ իրավիճակներ չստեղծելով ինչպես իրենց ուղևորների, այնպես էլ այս երթևեկության մյուս մասնակիցների համար:
Չեմ բացահայտի մեկ այլ գաղտնիք, եթե ասեմ, որ այս որոշումը արդիական էր բոլոր ժամանակներում: Եվ պատմության մեջ դուք կարող եք գտնել երկխոսության, վստահության և գործընկերության նախագծեր, որոնք ժամանակին ապահովում էին ողջ տարածաշրջանի բարգավաճումը: Որպես ամենավառ օրինակներից մեկը՝ կցանկանայի նշել Մեծ Մետաքսի ճանապարհը:
Մեծ Մետաքսի ճանապարհը, լինելով ողջ մարդկության պատմամշակութային ժառանգությունը, կարևոր դեր ունեցավ Արևմուտքի և Արևելքի երկրների և ժողովուրդների միջև տնտեսական կապերի զարգացման գործում: Հայկական լեռնաշխարհում հատվում էին առևտրային մայրուղիները, հետևաբար պատմականորեն Հայաստանը դարեր շարունակ Մետաքսի ճանապարհի ամենակարևոր տարանցիկ կետն էր՝ միացնելով Եվրոպան և Ասիան:
Այսօր անհրաժեշտ է բարձրացնել ինտեգրացիոն գործընթացների արդյունավետությունը, խթանել կապերի զարգացումը: Որպես Եվրասիական տնտեսական միության նախագահող երկիր՝ Հայաստանը հատուկ կարևորություն է տալիս արտաքին տնտեսական հարաբերությունների ընդլայնմանն ինչպես կազմակերպության անդամների, այնպես էլ այլ գործընկերների միջև: Մեր առաջնահերթությունները ներառում են այնպիսի ոլորտներ, ինչպիսիք են էներգետիկ արդյունաբերությունը, եվրասիական տրանսպորտային ենթակառուցվածքների տարանջատումը, տնտեսության բարձր տեխնոլոգիաների բնագավառի զարգացումը և միության թվային օրակարգի լիարժեք իրականացումը, ֆինանսական հատվածի աճի և կայունության ապահովումը: Հայաստանը ջանքեր է գործադրում Սինգապուրի, Սերբիայի, Եգիպտոսի և Հնդկաստանի հետ բանակցություններն արդյունավետ ավարտելու ուղղությամբ՝ համագործակցության առավել փոխշահավետ տնտեսական հարթակներ ձեռք բերելու համար: Իրանի և Չինաստանի հետ համաձայնագրերն արդեն վավերացվել են Հայաստանի Ազգային ժողովի կողմից:
Հարգելի գործընկերներ, գլոբալիզացիայի դարաշրջանում անթույլատրելի են բաժանարար գծերը և փակ սահմանների առկայությունը: Փակ սահմանները, շրջափակումները ամբողջ Եվրասիական տարածաշրջանի խնդիրներն են, քանի որ բաժանարար գծերի պայմաններում անհնար է լիարժեք տնտեսական զարգացում, քաղաքական, մշակութային երկխոսություն: Միջոցների ազատ տեղաշարժը, անխափան շփումները ժամանակակից տնտեսական և հումանիտար հարաբերությունների զարգացման ամենակարևոր պայմաններն են:
Եվրասիական տարածաշրջանի կայուն զարգացումը հնարավոր է միայն անվտանգ միջավայրում: Հակամարտությունների առկայությունը Հարավային Կովկասում խոչընդոտում է տարածաշրջանի զարգացմանը: Հայաստանը վերահաստատում է իր նվիրվածությունը Լեռնային Ղարաբաղի հակամարտության բացառապես խաղաղ կարգավորմանը՝ ԵԱՀԿ Մինսկի խմբի համանախագահության ձևաչափով: Այս հակամարտությունը ռազմական ճանապարհով լուծելու ցանկացած փորձ ոտնձգություն է մարդու իրավունքների, ժողովրդավարության և խաղաղության համար: Մեզ համար գերակա նշանակություն ունեն Լեռնային Ղարաբաղի կարգավիճակի և անվտանգության հարցը, ժողովրդի անվտանգ և ազատ գոյության անհերքելի իրավունքի հարգումը:
Գործընկերներ, այսօր մենք ներկա ենք բաց քննարկման հարթակում՝ հավասար երկխոսության համար: Մենք ցանկանում ենք հարստացնել մեր փորձը և գտնել փոխգործակցության առավել արդյունավետ ուղիներ և ձևեր: Համոզված եմ, որ այս իրադարձությունը կնպաստի բարեկամության ամրապնդմանը` բացահայտելով փոխշահավետ համագործակցության նոր ուղիներ՝ հանուն Եվրասիայի ժողովուրդների բարօրության»: