Թեյլոր Սվիֆթը Vogue-ի նոր համարում խոսել է Քիմ Քարդաշյանի երկրպագուների կողմից հարձակման ենթարկվելու մասին (լուսանկարներ)
Ամերիկացի հայտնի երգչուհի Թեյլոր Սվիֆթը Vogue-ի նոր թողարկման մեջ խոսել է ամերիկահայ մոդել Քիմ Քարդաշյանի երկրպագուների կողմից հարձակման ենթարկվելու, երգչուհի Քեթի Փերիի հետ թշնամանքն ավարտելու և ԱՄՆ նախագահական ընտրություններում Հիլարի Քլինթոնին հրապարակայնորեն չաջակցելու մասին, գրում է Daily Mail-ը:
29-ամյա երգչուհին պատմել է իր ծայրահեղ «մեկուսացման» մասին, որը զգացել է Քիմ Քարդաշյանի և նրա երկրպագուների հարձակումից հետո:
Երկու հայտնի կանանց միջև թշնամանքը սկսվել էր այն ժամանակ, երբ Թեյլորը ռեփեր Քանյե Ուեսթին մեղադրել էր իր երգում իր հասցեին վիրավորական խոսքեր հնչեցնելու համար:
Քանյեն, ի պատասխան, հայտարարել էր, որ երգի բառերի շուրջ նախապես զրույց է ունեցել Թեյլորի հետ և ստացել է նրա համաձայնությունը: Դրանից հետո Քիմը հրապարակել էր տեսանյութ, որում Թեյլորն իր համաձայնությունն էր տալիս երգի բառերի վերաբերյալ:
«Ոչ բոլորը կհասկանան, թե ինչ է նշանակում միլիոնավոր մարդկանց կողմից ատելության արժանանալ»,- անկեղծացել է երգչուհին:
Պատասխանելով ամերիկացի երգչուհի Քեթի Փերիի հետ թշնամանքին վերջ տալու մասին հարցին՝ երգչուհին նշել է, որ առաջին քայլը Փերին է արել՝ ձիթենու ճյուղ ուղարկելով:
Թեյլորի դեմ ատելության ևս մեկ արշավ էր սկսվել 2016 թվականի նախագահական ընտրությունների ժամանակ, երբ նա որոշել էր չբարձրաձայնել իր քաղաքական հայացքների մասին:
Չնայած նրան, որ նա Հիլարի Քլինթոնի կողմնակիցն էր, Թեյլորը չէր ցանկանում հրապարակայնորեն աջակցել նրան, քանի որ նրա կարծիքով՝ «դա ավելի շատ խոչընդոտ կլինի, քան օգնություն»:
