Քաղաքապետարանը 1 մլրդ 726 մլն դրամ է տրամադրում աղբահանության համար մեքենաներ ձեռք բերելուն, փոխարենը 91 մլն կրճատում է մանկապարտեզները վերանորոգելու ֆոնդից
Երևանի ավագանու նիստն այսօր վարում է փոխքաղաքապետ Հրաչյա Սարգսյանը: Ի պատասխան Երևանի ավագանու «Լույս» խմբակցության ղեկավար Դավիթ Խաժակյանի հարցին, թե ինչու նիստը չի վարում քաղաքապետ Հայկ Մարությանը, Սարգսյանն ասաց, որ քաղաքապետը մի փոքր վատառողջ է:
Ավագանին քննարկում է «Աղբահանություն և սանիտարական մաքրում» ծրագրով նախատեսված գումարները 1 մլրդ 726 մլն դրամով ավելացնելու հարցը, որից 1 մլրդ 571 մլն դրամը տրանսպորտային սարքավորումներ հոդվածով:
Նախատեսվում է ձեռք բերել 5 սանիտարական մաքրման մեքենա, 11 բազմաֆունկցիոնալ կոմունալ ճանապարհային մեքենա, 22 մայթերի ձնահավաք մեքենա, 10 աղբատար մեքենա` հետևի բարձմամբ և 3 կոնտեյներների լվացման մեքենա:
155 մլն դրամ կտրամադրվի Երևան քաղաքում արդեն հնամաշ, այրված, ջարդված և շարքից դուրս եկած կոնտեյներները նոր կոնտեյներներով փոխարինելու և դրանց քանակը ավելացնելու նպատակով թվով 1000 նոր կենցաղային թափոնների կոնտեյներների ձեռքբերման համար:
Միևնույն ժամանակ քաղաքապետարանը 91 մլն դրամով նվազեցնում է «Նախադպրոցական հաստատությունների հիմնանորոգում և վերանորոգում» ծրագիրը:
Հիմնական զեկուցող քաղաքապետի տեղակալ Հայկ Սարգսյանն ասաց. «Առաջարկում ենք՝ 91 մլն հոդվածատեղափոխություն կատարել նախադպրոցական հաստատություններ վերանորոգելու հոդվածից, որպեսզի ամբողջանա մեզ համար անհրաժեշտ 1 մլրդ 726 մլն դրամը»:
Երևանի ավագանու ԲՀԿ խմբակցության անդամ Միքայել Մանրիկյանը հետաքրքրվեց, թե ինչու է կրճատվում մանկապարտեզների համար նախատեսված 91 մլն դրամը, արդյոք հնարավոր չէ՞ր այդ կրճատումներն անել պարգևավճարներից, գործուղումներից և այլ տեղերից: «Ինչո՞ւ պետք է կրճատում անենք մեր երեխաների հաշվին»,- հարցրեց նա:
Հարցին պատասխանեց նիստը վարող Հրաչյա Սարգսյանը: Նա տեղեկացրեց, որ մանկապարտեզների վերանորոգման համար բյուջեով հաստատել են 1 մլրդ 400 մլն-ի չափով գումարը. «Գիտեք, շինարարական աշխատանքը նախատեսում է նախագծանախահաշվային փաստաթղթեր: 2018 թվականի նոյեմբերին փոփոխություն էր տեղի ունեցել նախագծողների լիցենզավորման կարգում, այդ պատճառով միայն փետրվար-մարտ-ապրիլին նախագծանախահաշվային փաստաթղթերի մրցույթ հայտարարեցինք»:
Նրա խոսքով՝ այս պահին 21 մանկապարտեզների նախագծանախահաշվային փաստաթղթերը պատրաստ են, իսկ շինարարական աշխատանքները կատարելու համար պետք է մրցույթ հայտարարվի: Նա նշեց, որ մրցույթի արդյունքները հայտնի կլինեն դեկտեմբերին և միայն մյուս տարի գարնանը հնարավոր կլինի իրականացնել վերանորոգման աշխատանքները:
Հիմնական զեկուցող Հայկ Սարգսյանն էլ ասաց, որ եթե այդ 91 մլն դրամը մնա այս հոդվածում, տարեվերջին այն համարվելու է որպես տնտեսում: «Ուստի որոշումը, որ հոդվածից արվի տեղափոխությունը, բացառապես հիմնավորված է այն հոդվածների վրա, որոնցով մենք նախատեսում ենք տարեվերջին տնտեսումներ: Հավաստիացնում եմ՝ որևէ մանկապարտեզի վերանորոգում չի տուժում այս կրճատման արդյունքում»,- հայտարարեց նա:
Երևանի ավագանու «Լույս» խմբակցության ղեկավար Դավիթ Խաժակյանն էլ հետաքրքրվեց, որքան գումար է տրամադրվելու պահուստային ֆոնդից, որ լրանա աղբահանության համար այդ 1 մլրդ 726 մլնը, Հայկ Սարգսյանն ասաց, որ նախորդ տարվանից տնտեսել էին 8 մլրդ դրամ, որի մի զգալի մասը տեղաբաշխել են պահուստային ֆոնդում: Այս պահին պահուստային ֆոնդում մնացել է 500 մլն դրամ և այն մինչև տարեվերջ կբավարարի, քանի որ բոլոր խոշոր ծախսերն արդեն արվել են: