ԱԺ-ն բավարարեց ՍԴ-ի պահանջը. «ԱԺ կանոնակարգ» և «ՍԴ-ի մասին» օրինագծերի փաթեթը միաձայն ընդունվեց
ԱԺ-ում քննարկման, ապա քվեարկության դրվեց «Ազգային ժողովի կանոնակարգ» սահմանադրական օրենքում փոփոխություններ կատարելու մասին » և կից ներկայացված «Սահմանադրական դատարանի մասին» սահմանադրական օրենքներում փոփոխություններ և լրացումներ կատարելու մասին» նախագծի փաթեթը:
Նախագիծն ընդունվեց երկրորդ ընթերցմամբ և միաձայն՝ 83 կողմ:
Մինչ այդ հիմնական զեկուցող Արդարադատության նախարար Արտակ Զեյնալյանը նշեց, որ նախագիծը պայմանավորված է Սահմանադրական դատարանի որոշումը կատարելով: Նա հիշեցրեց, որ ՀՀ նախագահը դիմել էր ՍԴ և վիճարկել ԱԺ կանոնակարգ օրենքի և ՍԴ օրենքների սահմանադրականությունը:
ԲՀԿ խմբակցության պատգամավոր Գևորգ Պետրոսյանը նշեց, որ ԲՀԿ-ն ամբողջ խնդիրը դիտարկում է ոչ թե կոնկրետ անձանց դիտանկյունում, այլ ընդամենը շահագրգռված է, որ օրենքի նորմը լինի հստակ ընկալելի:
«Այս ձևաչափից ելնելով՝ մենք դրական ենք վերաբերում ներկայացված նախագծին, իսկ «նոր թեկնածու» եզրույթը հասկանում ենք հետևյալ կտրվածքով: Այսօր արդեն իսկ ներկայացված թեկնածուն բավարարում է նոր թեկնածու հասկացության չափանիշներին՝ որպես ՍԴ անդամ: Չընտրվելու դեպքում կարող է ներկայացվել 7-րդ գումարման ԱԺ-ում դեռևս չներկայացված թեկնածություն, որը կարող է լինել ցանկացած անձ, այդ թվում նաև 6-րդ գումարման ԱԺ-ում ներկայացված և ԱԺ-ի վստահությունն այդ ժամանակ չստացած թեկնածուն»,-ասաց նա:
Պետրոսյանը նշեց, որ օրենքի իմաստն այն է, որ ի նշան պետական հիմնարկների փոխադարձ վստահության և հարգանքի՝ տեղի չունենա իրավունքի չարաշահում, և օգտվելով սահմանադրության մեջ ամրագրված հստակ արգելքի բացակայությունից՝ նույն սուբյեկտը անընդհատ ԱԺ ներկայացնի նույն մարդուն:
«Մենք կառնչվենք իրավունքի չարաշահման հետ, և դա նաև ողջամիտ չէ, որ նույն սուբյեկտը նույն անձին ներկայացնի ԱԺ»,-ասաց նա:
«Իմ քայլը» խմբակցության պատգամավոր Վլադիմիր Վարդանյանը նշեց, որ կրկնելով Պետրոսյանի դիրքորոշումը, նախաձեռնում են թեկնածու ներկայացնելու նոր գործընթաց:
«Մենք չենք կարող որևիցե եղանակով սահմանափակել այս կամ այն պաշտոնում թեկնածու առաջադրելու իրավունք ունեցող սուբյեկտի լիազորությունները և լիովին կիսում եմ կարծիքը, որ փոխադարձ հարգանքը տարբեր ինստիտուտների նկատմամբ նշանակում է այն, որ ԱԺ-ն ևս պետք է հարգի այլ անձի առաջադրելու իրավունքը»,-ասաց նա և նշեց, որ այս մեկնաբանությամբ էլ պատրաստվում են քվեարկել:
ԼՀԿ խմբակցության պատգամավոր Տարոն Սիմոնյանը նշեց, որ երբ գրած է նոր թեկնածու, դա վերբերում է և՛ գործընթացին, և՛ անձին, և այդ հարցում պետական մարմինների հարգանքից ելնելու տրամաբանությամբ պետք է առաջադրվեն:
«Միևնույն մարմինը նոր թեկնածու պետք է առաջադրի, այլ ոչ թե միևնույն անձին բազմիցս առաջադրի՝ անարգելով այն պետական մարմինը, ում առջև այդ թեկնածուն ներկայացվում է»,-ասաց նա:
Նշենք, որ Սահմանադրությանը հակասող են ճանաչվել «ԱԺ կանոնակարգ» օրենքի 141-րդ հոդվածի դրույթները՝ հաշվի առնելով այն հանգամանքը, որ ՍԴ դատավորի ընտրության անցկացումը՝ ներառյալ առաջադրմանը եւ պաշտոնի ստանձնմանը վերաբերող կարգավորումները, էական մանրամասներ բովանդակելու կարգավորումներ են, որոնք պետք է ամրագրվեն «ՍԴ մասին» սահմանադրական օրենքում:
Սահմանադրական դատարանը, հաշվի առնելով այն հանգամանքը, որ այս դրույթն անմիջապես ուժի մեջ մտնելու դեպքում կառաջանա իրավական բաց, ուժի մեջ մտնելու ժամկետը հետաձգել է մինչեւ 2019 թ ապրիլի 1-ը:
«Սահմանադրական դատարանի մասին» օրենքում փոփոխություններով հստակեցվում է ՍԴ դատավորի պաշտոնն ստանձնելու պահը, սահմանվում են իրավասու մարմիններին տեղեկացնելու, ընտրության ժամկետները:
Նշենք, որ ՍԴ անդամի նոր թեկնածու է ներկայացվել Գոռ Հովհաննիսյանը: Ընդունված օրենքի համաձայն, եթե նոր թեկնածուն այս անգամ էլ չընտրվի, նա չի կարող որպես ՍԴ անդամի նոր թեկնածու մեկ անգամ էլ ներկայացվել, մինչդեռ այն թեկնածուները, որոնք առաջադրվել են ԱԺ 6-րդ գումարման նիստին և ԱԺ-ի կողմից չեն ընտրվել, նրանց թեկնածությունը 7-րդ գումարման նիստին կարող են առաջադրել: