Ովքեր նոր սերնդի ՀԴՄ ստանալու հայտ են ներկայացրել և չեն վերցնում դրանք, նրանց նկատմամբ վարչարարություն չկիրառելը խելամիտ չէ. Դավիթ Անանյան
ՀԴՄ-ների ներկրման ՊՈԱԿ-ը բացառապես զբաղվելու է երեք գործառույթով, այս մասին կառավարության նիստից հետո լրագրողների հետ զրույցում ասաց ՊԵԿ նախագահ Դավիթ Անանյանը:
Նա նշեց, որ ՊՈԱԿ-ի գործառույթը լինելու է սահմանամերձ բնակավայրերում և համայնքներում գործունեություն իրականացնողներին տրամադրել անվճար ՀԴՄ-ներ, և այդ ՀԴՄ-ների անվճար տեխնիկական սպասարկումն իրականացնելը:
«Մի գործառույթ էլ կա. այն տնտեսվարողները, որոնք ցանկություն կունենան ոլորտում գործունեություն իրականացնել, ներմուծել ՀԴՄ-ներ և վաճառել դրանք, այդ ՀԴՄ-ների տեխնիկական պարամետրերի հնարավորությունների համապատասխանության վերլուծություն պետք է իրականացնի ՊՈԱԿ-ը»,- ասաց նա:
Հարցին, թե դրանից ՀԴՄ-ների գները կնվազե՞ն, թե՞ կավելանան, նա պատասխանեց, որ գները չեն ուսումնասիրել: «Դա մեզ չի հետաքրքրում, ոլորտի ազատականացման իմաստն այն է, որ ՀԴՄ-ների գները և դրանց տեխնիկական սպասարկման գներն ամբողջությամբ որևէ ձևով պետության կողմից չեն վերահսկվելու: Արդյունքում կարող է ավելի թանկ լինել, կարող է և ավելի էժան լինել: Դաշտում որքան խաղացողները շատանան ժամանակի ընթացքում, բնականաբար, բոլոր գները կնվազեն»,- նշեց նա:
Իսկ թե քանի ՀԴՄ ներմուծող կազմակերպություն կա՞ այս պահին, Անանյանը նշեց, որ կա շուրջ 10 կազմակերպություն, որոնք չբացահայտման մասին պայմանագիր են կնքել ՊՈԱԿ-ի հետ:
«Դա նշանակում է, որ այդ կազմակերպությունները պետք է ուսումնասիրեն մեր ծրագրային ապահովումները, որպեսզի այդ ՀԴՄ-ները մեր ծրագրային ապահովմանը, մեր ցանցին կարողանան կպնել, հասանելիություն ապահովեն: Հետևաբար, մեր ցանցի ուսումնասիրման համար այդ կազմակերպությունները կնքել են չբացահայտման համաձայնագիր: Ենթադրվում է, որ մոտ ապագայում այդպիսի կազմակերպությունների թիվը կշատանա: Այսօր էլ կան կազմակերպություններ, որ ներմուծել են ՀԴՄ-ներ և մեզ հետ աշխատում են»,- նշեց Անանյանը:
Հարցին` այս պահի դրությամբ քանի կազմակերպություն է նոր սերնդի ՀԴՄ-ներից օգտվելու հայտ ներկայացրել, Անանյանը պատասխանեց. «Շուրջ 24 հազար, որից բավարարվել է կեսը: 11,980 հայտ բավարարվել է, շուրջ 6000 ՀԴՄ տրամադրվել է, մոտ 3000 ՀԴՄ կա, որ անձինք չեն գալիս տանեն: Կհորդորեմ`ովքեր հայտ են ներկայացրել և ձգձգում են նոր ՀԴՄ–ների ստացումը, գան տանեն, որովհետև կարող ենք վարչարարության հետ կապված մեր վարքագիծը փոխել»,- ասաց Անանյանը։
ՊԵԿ նախագահը հավելեց, որ եթե իրենք հայտարարել են, ով նոր սերնդի ՀԴՄ ստանալու հայտ է ներկայացրել իր նկատմամբ վարչարարություն չի կիրառվի, ապա կարող են հայտարարել հետևյալը` ով հայտ ստացել է, բայց հայտը դեռ բավարարված չէ, նրանց մոտ վարչարարություն չի իրականացվի, բայց բավարարված հայտերի պարագայում` վարչարարություն չիրականացնելը խելամիտ չէ:
Ինչ վերաբերում է բենզալցակայաններում ՀԴՄ չտրամադրելուն, ապա Անանյանը նշեց, որ այժմ էլ դրա համար բավականին խիստ վարչարարություն իրականացվում է: «Շատ բենզալցակայաններ ՀԴՄ-ները հանել են դուրս և տեսանելի դաշտում են դրել, այդ խողովակների մոտ, որ ավելի արագ պահանջի դեպքում կտրոնները տրամադրեն: Բոլորս անողոք պայքար ենք մղում դրանց դեմ»,- եզրափակեց նա:
Ամալյա Առաքելյան