Ըստ Լ. Զուրաբյանի՝ սահմանադրական փոփոխությունների համար ասողին լսող է պետք, իսկ Պ. Մակեյանը հուսով է, որ վարչապետը կհասկանա` պետք է գնալ դրան
Բոլոր փաստարկները ներկայացված են: Այս մասին Tert.am-ի հետ զրույցում ասաց Հայ ազգային կոնգրեսի փոխնախագահ Լևոն Զուրաբյանը`անդրադառնալով Սահմանադրության փոփոխությունների վերաբերյալ ՀՀ վարչապետ Նիկոլ Փաշինյանի հայտարարությանը, ըստ որի՝ Սահմանադրությունը կենդանի օրգանիզմ է, բայց այն կարծիքին չէ, որ հիմա կառավարման համակարգի փոփոխության անհրաժեշտության առաջ ենք կանգնած:
Լևոն Զուրաբյանը չցանկացավ այլ բան ավելացնել և միայն ասաց. «Բոլոր փաստարկները ներկայացված են, բայց ասողին լսող է պետք»:
Իսկ «Ժողովրդավարական հայրենիք» կուսակցության նախագահ Պետրոս Մակեյանը սահմանադրական փոփոխություններն արագ նախաձեռնելու անհրաժեշտություն էր տեսնում և նախկինում համոզմունք էր հայտնել, որ Նիկոլ Փաշինյանն այդ նախաձեռնությունը կսկսի: Tert.am-ի հետ զրույցում Մակեյանը նշեց, որ դասական առումով թեև ձևակերպումը ճիշտ է, որ Սահմանադրությունը կենդանի օրգանիզմ չէ, բայց համաձայն չէ այս դեպքում, քանի որ դա չի ընդունվել հանրաքվեով ժողովրդի կողմից:
«Այդ Սահմանադրությունը Հայաստանի համար չարիք է: Դա կարված էր Սերժ Սարգսյանի պատվերով, իր համար, բացի այդ Հայաստանում չի գործել ընտրական համակարգ»,-ասաց նա:
Ըստ նրա` եթե մենք ընդունում ենք դասական առումով, որ խորհրդարանական համակարգը ամենաբարձր ժողովրդավարական կառավարման համակարգն է, ապա դա կարող է գործել միայն կուսակցությունների քաղաքական դաշտի կայացման դեպքում, իսկ 20 տարի քաղաքական դաշտը ասպատակվել է, քաղաքական կուսակցություններ չկան:
Վարչապետ Փաշինյանը, նշենք, Սահմանադրության մասին ասել էր. «Իմ անձնական կարծիքն այն է, որ մենք կառավարման համակարգը փոխելու անհրաժեշտություն չունենք, քանի դեռ չունենք կոնկրետ փաստարկներ, թե ինչու է դա անհրաժեշտ»,-ասել է վարչապետը:
Ամեն դեպքում Պետրոս Մակեյանն ասաց, որ Նիկոլ Փաշինյանի հայտարարությունից չի ընկալել, որ ինքը կտրուկ դեմ է: «Ես կարծում եմ, որ առաջիկա 1-2 ամսվա ընթացքում կփորձենք հասկանալ, թե իրականում իրենք հասկանում են, որ այս Սահմանադրությունը չարիք է, որովհետև դա բազմաթիվ խնդիրներ է ստեղծել, և երկրորդ` մենք պետք է վերադառնանք կիսանախագահականին, բայց չի նշանակում հին Սահմանադրություն, պարզապես կիսանախագահականը պետք է ուսումնասիրել, քննարկել, մասնագիտական մոտեցումներով: Մեր Սահմանադրության բոլոր փոփոխություններն ինչ-որ մեկի չափին ու ձևին են կարվել»,-ասաց նա:
Դիտարկմանը, թե ստացվում է, որ այս իշխանության համար էլ է այդ Սահմանադրությունը «հարմար», Պետրոս Մակեյանն արձագանքեց. «Ես իմ հույսը չեմ կորցնում, որ Նիկոլ Փաշինյանը, մտածելով, վերլուծելով, քննարկելով, նաև մեր ասածը լսելով, կհասկանա, որ պետք է գնա փոփոխության, հակառակ դեպքում ժողովուրդն ասում է, որ այդ Սահմանադրության հետ ես կապ չունեմ, դու ո՞նց ես դրանով աշխատում»: