Գլխավորելով Ղազախստանի անվտանգության խորհուրդը՝ Նազարբաևը փաստացի շարունակում է մնալ երկրի ղեկավար. քաղաքագետ (տեսանյութ)
Հայաստանի և Ղազախստանի իրավիճակների միջև զուգահեռներ անցկացնելու համար պետք է լավ ծանոթ լինել ղազախական և արևելյան հասարակությունների կառուցվածքին: Այս մասին Tert.am-ի հետ զրույցում ասաց քաղաքագետ Ալեն Ղևոնդյանը՝ անդրադառնալով Ղազախստանի նախագահ Նորսուլթան Նազարբաևի հրաժարականին:
Քաղաքագետի խոսքով՝ 30 տարվա ընթացքում Նորսուլթան Նազարբաևի գործունեության արդյունքում երկրում ՀՆԱ-ի աճը եղել է բավականին բարձր, հասարակության կենսամակարդակը ևս բարձր է եղել. «Դեմոկրատական արժեհամակարգի տեսանկյունից, իհարկե, Ղազախստանը առանձնապես առաջատար դիրքեր չի գրավել, բայց դա որևէ ձևով չի խանգարել քաղաքացիներին, նրանց բավարարվածության, իշխանություն-հասարակություն հարաբերակցության ադեկվատ ընկալման տեսանկյունից: Հետևաբար, երբ մենք փորձում ենք հարաբերակցության ինչ-որ եզրեր գտնել Հայաստանի և Ղազախստանի իրավիճակների միջև, առաջին հերթին պետք է հաշվի առնենք, որ միջին վիճակագրական ղազախստանյան իսթեբլիշմենթը և քաղաքացիները, մեծ հաշվով, բավարարված էին Ղազախստանի միջազգային և տարածաշրջանային դերակատարումից»:
Ղևոնդյանը նաև ընդգծում է՝ Նազարբաևը շատ լավ հասկանում էր՝ ավելի լավ է մեկ օր շուտ հրաժարվել երկրի նախագահի պաշտոնից, քանի որ մնալը հետագայում կարող էր ունենալ անցանկալի հետևանքներ:
«Մեծ հաշվով՝ եթե խոսում ենք քաղաքական իշխանությունից զրկվելու և ազդեցության լծակները փոխարինելու, ուրիշին տրամադրելու իրողությունների մասին, ապա, իհարկե, Ղազախստանում դա տեղի չի ունեցել, որովհետև Անվտանգության խորհրդի լիազորությունները, որով Նազարբաևն այսօր շարունակում է իր գործունեությունը, երկրի ղեկավարման լուրջ հնարավորության դաշտ է նրան տալիս, հետևաբար նա շարունակում է մնալ երկրի ղեկավարը, շարունակում է ունենալ այն ազդեցությունը, որն ուներ, իսկ դա բավականին բացառիկ էր և, այսպես ասած, երկրի առաջնորդի կարգավիճակի դերակատարում է ստանձնում, որը, կարծում եմ, միջին վիճակագրական ղազախստանյան քաղաքացու համար դիսկոմֆորտի պատճառ չէ»:
Հարցին, թե սա անցնցում ճանապարհով իշխանությունը փոխելու ձև՞ էր, Ղևոնդյանն ասաց. «Ես կարծում եմ, որ այսպես Ղազախստանում տեղի ունեցավ թավշյա ձևով իշխանափոխության որոշակի գործընթաց, և իշխանությունը Ա կետից տեղափոխվեց Ա1 կետ՝ գտնվելով Ղազախստանի ղեկավարի վերահսկողության ներքո: Այստեղ ինստիտուցիոնալ փոփոխության մասին ենք ավելի շատ խոսում, որովհետև Ղազախստանյան իրականությունը շատ տարբերվում է հարավկովկասյան, հայկական իրականությունից: Էնտեղ իշխանության փոխանցումը փողոցի ճանապարհով կարող էր շատ մեծ խնդիրների բերել»:
Մանրամասները՝ տեսանյութում: