Առանց կանանց աշխարհը կկանգնի. Բելգիայում կանայք համընդհանուր գործադուլ են իրականացնում մարտի 8-ին
Բելգիայում մարտի 8-ին առաջին անգամ համընդհանուր գործադուլ է հայտարարվել՝ ի պաշտպանություն կանանց իրավունքների: Ինչպես հաղորդում է INTERFAX.RU-ն, գործադուլն իրականացվում է Collecti.e.f 8 mars ֆեմինիստական հարթակի կոչով:
«Գործադուլը պետք է ցույց տա, որ առանց կանանց աշխարհը կկանգնի», - ասվում է կազմակերպիչների կոչում: Դեռևս պարզ չէ, թե գործնականում ինչ ծավալներ կունենա նախաձեռնությունը, սակայն բելգիական ԶԼՄ-ներն արդեն հայտնում են որոշակի խափանումների մասին մի շարք հիվանդանոցներում, ծերանոցներում, այլ հաստատություններում, որտեղ անձնակազմի մեծ մասը կազմում են կանայք:
«Մենք որպես միջոց ընտրել ենք գործադուլը, քանի որ աշխատանքի կանգն ուժեղ ազդանշան է: Դա թույլ է տալիս ցույց տալ, թե ինչքան անհրաժեշտ են կանայք: Պարզ է, որ կանանց և տղամարդկանց միջև հավասարությունն իրականություն չէ», - աղբյուրը մեջբերում է կազմակերպչական հանձնաժողովի ներկայացուցչին: