ԿԳՆ-ն պետք է դառնա համակարգը մոբիլիզացնող կառույց. այս պահին դա դեռ չեմ տեսնում. փորձագետը՝ Կառավարության ծրագրում կրթության բաժնի մասին
Կառավարության հնգամյա ծրագրի կրթության ոլորտը չէի համարի վատը, սակայն այն հեղափոխական ևս չէի համարի: Այնպես չէ, որ եթե այն իրականացվի, Հայաստանը կունենա լավ կրթական համակարգ: Այս մասին Tert.am-ի հետ զրույցում ասաց կրթության փորձագետ Սերոբ Խաչատրյանը:
«Սովորական ծրագիր է, այնտեղ գրված շատ բաներ շարունակվում են նախորդ կառավարությունից: Առանձնապես չեմ տեսնում մի բան, որը նոր է, թարմ է, կարող է արմատական փոփոխությունների բերել»,- ասաց նա:
Փորձագետը նկատեց, որ, օրինակ, գրված է «կառավարման համակարգի բարելավում», բայց հարցն այն է, թե ինչ երաշխիքներ կան, որ նոր համակարգը լավը կլինի: «Իմ կարծիքով, ամենակարևորն այն է, թե ինչպես կիրականացվի այս ծրագիրը, որովհետև կարող է՝ շատ շքեղ բաներ գրվեն, բայց վատ իրականացվի, սակայն կարող եք նաև համեստ բաներ գրել ու լավ իրականացնել, հուսանք, որ երկրորդ տարբերակը կլինի: Ես չէի ասի, թե շատ նոր շնչով գրված ծրագիր է»,- ասաց նա:
Սերոբ Խաչատրյանը, անդրադառնալով դպրոցական առարկաների վերանայման հարցին, ասաց, որ առարկաների վերանայումը պարտադիր պահանջ է, և այդ մասին որոշումը վաղուց է կայացված: Նա ասաց, որ որոշակի նախագիծ 2016 թվականին եղել է, մշակվել են նոր չափորոշիչներ, ծրագրեր մշակվել են, որոնք կիսատ են մնացել: «Խնդիր կա դա հասցնել ավարտին, որովհետև աշխարհում ընդունված է 5-10 տարին մեկ վերանայել»,- ասաց նա:
Փորձագետը կարևորեց, որ նախարարության աշխատաոճն էլ, անհրաժեշտ է, որ փոխվի: «Այս փուլում առավել կարևոր է ոչ թե նախարարությունում մարդկանց կրճատելը, այլ աշխատաոճի փոփոխությունը, կրթության նախարարությունը պետք է դառնա համակարգը մոբիլիզացնող, ոգեշնչող, զարգացման տանող կառույց, այս պահին դա դեռ չեմ տեսնում:
Այս պահին ես տեսնում եմ որոշակի կոռուպցիայի դեմ պայքարի ձևեր, տեսնում եմ որոշակի բարելավումներ բուհերի խորհուրդների հետ կապված, բայց այսօր օրակարգ են գցում թեմաներ, որոնք կրթական համակարգը ավելի են ջլատելու, մի շաբաթից ավելի է՝ քննարկվում է հայ եկեղեցու, շախմատի առարկայի հարցերը, սրանք թեմաներ են, որոնք համակարգը ավելի են մաս-մաս անելու: Այս տեսակի պառակտումներ մեզ պետք չեն, հազիվ մոբիլիզացիա է եղել»,- ասաց նա: