Ռազմավարական առումով մեծ նշանակություն չի ունենա. վերլուծաբանը` իսրայելական ընկերության կողմից Բաքվին «մահապարտ» անօդաչու թռչող սարքերը վաճառելու թույլտվության մասին
Ռազմավարական առումով չեմ կարծում՝ մեծ նշանակություն կունենա, ամեն դեպքում տհաճ է դա մեզ համար: Tert.am-ի հետ զրույցում ասաց Razm.info-ի վերլուծաբան Հայկ Խաչիկյանը` անդրադառնալով Իսրայելի պաշտպանության նախարարության կողմից նախկինում սահմանված արգելքի չեղարկմանը և իսրայելական Aeronautics ընկերությանը Ադրբեջանին` հայկական կողմի դեմ կիրառված «մահապարտ» անօդաչու թռչող սարքերը վաճառել թույլատրելուն:
Հայկ Խաչիկյանը նշեց, որ արգելքը դրվել էր 2018 թվականի ամռանը, որից հետո Իսրայելի պաշտպանության նախարարությունն արգելանք դրեց այդ ընկերության երեք բարձրաստիճան պաշտոնյաների վրա` արգելելով նրանց ներկայացնել ռազմաարդյունաբերական համակարգն օտար երկրներում, իսկ հիմա ընկերության նկատմամբ արգելքը հանվել է:
«Այստեղ մի ուրիշ դետալ էլ կա, տեղեկություններ կան, որ իսրայելական մեկ այլ ընկերություն`«Ռաֆայելը», որը շատ ավելի մեծ ընկերություն է, ցանկություն ունի գնել Aeronautics -ը»,-ասաց նա:
Չնայած դրան՝ վերլուծաբանը նկատեց, որ եթե Ադրբեջանը մի ընկերությունից զրկվում է, մեկ այլ ընկերությունից է ձեռք բերում համակարգերը և գուցե, այս արգելքի վերացմամբ ծավալները մեծանան: «Իհարկե, այդ համակարգերն ուղղված են մեր դեմ, սակայն ռազմավարական մակարդակում առանձնապես ուժի բալանսի փոփոխություն չի բերի, քանի որ այդ զենքերից կային Ադրբեջանում, և հիմա գուցե ծավալները մեծանան: Այն, որ այդ համակարգերը մեզ համար վտանգ են հանդիսանում, գործնականում ապացուցվել է, և ապրիլյան պատերազմում կիրառվեցին այդ տեխնիկաները: Ադրբեջանի վերջին խոշոր ձեռքբերումներից էին օպերատիվ մարտավարական հրթիռային համալիրները և մի քանի այլ զինատեսակներ, բայց դրանք վստահաբար լայնածավալ պատերազմի դեպքում կիրառվելու են մեր դեմ, այստեղ հարցն այն է, թե ոնց պետք է հակազդենք դրան: Պետք է հասկանալ, որ այստեղ առևտուր է գնում, ու չեմ կարծում, որ քաղաքական մոտիվներով է դա իրականացվում, պարզապես բիզնես է»,-ասաց նա:
Հայկ Խաչիկյանը նշեց, որ հայկական կողմն էլ որպես հակադրման միջոց ձեռք է բերում ռադիոէլեկտրոնային պայքարի միջոցներ, և դրան զուգահեռ նաև զարգացնում ենք մեր սեփական արտադրությունը:
Վերլուծաբանը նկատեց, որ երբ Ադրբեջանն Իսրայելից ձեռք բերեց օպերատիվ մարտավարական հրթիռային համակարգերը, դրանց պատասխանն էր մեր կողմից «Իսկանդերի» ձեռքբերումը, և այդ հարցում մեկ քայլ առաջ էինք, իսկ ներկայումս այս արգելքի վերացմամբ Ադրբեջանը հավասարվեց: