Վրաստանի նախագահի թեկնածու Սալոմե Զուրաբիշվիլին հայաշատ քաղաքում ելույթն սկսել է մեկ րոպե լռությամբ հարգելով Ազնավուրի հիշատակը
Վրաստանի նախագահական անկախ թեկնածու Սալոմե Զուրաբիշվիլին նախընտրական քարոզարշավ է իրականացրել Նինոծմինդա հայաշատ քաղաքում, որտեղ իր ելույթն սկսել է մեկ րոպե լռությամբ հարգելով աշխարհահռչակ շանսոնյե Շառլ Ազնավուրի հիշատակը: Այս մասին հաղորդում է Эхо Кавказа պորտալը:
«Մինչ այս պահը քաղաքացիության տրամադրումը նախագահի իրավասության ներքո է եղել: Նախագահներից մեկը չափազանց շատ երկքաղաքացիություն է շնորհել թուրքերին, սակայն ձեզ չի հատկացրել», - ասել է Զուրաբիշվիլին ելույթ ունենալով հայ համայնքի առաջ: Նմանօրինակ ելույթով նա հանդես էր եկել նաև Ախալցխայում:
Ընդդիմադիր գործիչները նրա ելույթը «սադրիչ և ազգամիջյան հարաբերություններում լարվածություն սերմանող» են անվանել, սակայն «Վրացական երազանք» կուսակցությունը, որն աջակցում է Զուրաբիշվիլիի թեկնածությանը, արտառոց ոչինչ չի տեսնում նրա խոսքերում:
Զուրաբիշվիլին ընտրողներին պատմել է երկակի քաղաքացիություն տրամադրելու հարցով օրենքում սահմանված փոփոխությունների մասին: