Թուրքիայում կորել է The Washington Post-ի սաուդացի լրագրողը
Թուրքիայում անհայտ կորել է Սաուդյան Արաբիայից հայտնի լրագրող, The Washington Post-ի թղթակից Ջամալ Խաաշկղիջին, որն օրեր առաջ մուտք է գործել Ստամբուլում Սաուդյան Արաբիայի գլխավոր հյուպատոսարան, ինչից հետո նրանից լուր այլևս չի ստացվել: Հայտնի է, որ Թուրքիայում քաղաքական լարվածության ֆոնին լրագրողը որոշում էր կայացրել լքել երկիրը: Այդ մասին գրում է թուրքական milatgazetesi.com-ը:
ԶԼՄ-ների թուրք-արաբական ասոցիացիայից նշել են, որ անհանգստությամբ հետևում են իրադարձությունների զարգացմանը, լրագրողից դեռ լուր չունեն:
Խաաշկղիջիի հարսնացուն լրատվամիջոցներին հայտնել է, որ օրեր առաջ լրագրողին հյուպատոսություն են կանչել փաստաթղթերի ձևակերպման համար: Հարսնացուն սպասել է Խաաշկղիջիին շենքի մոտ, սակայն նա այդպես էլ դուրս չի եկել: Նախօրեին իրավապահները նրան հայտնել են, որ իբր լրագրողն արդեն դուրս է եկել ու նրան այդտեղ սպասելու կարիք չկա:
Սաուդացի լրագրողի հարսնացուն նաև հայտնել է, որ հյուպատոսարանի շենք մտնելուց առաջ Խաաշկղիջին իրեն զգուշացրել է, որ եթե ժամեր անց նրանից լուր չունենա՝ ահազանգի ԶԼՄ-ների թուրք-արաբական ասոցիացիա: