Եթե չկա Կառավարության քաղաքականություն՝ կադրերն ընտրվում են տարերայնորեն, և նրանք ինչ-որ առումով նույնպես տարերայնորեն են գործում. Ս. Դանիելյան
Արտահերթ խորհրդարանական ընտրություններում իշխանություն դառնալու ձգտող «Քաղաքացիական պայմանագիր» կուսակցությունը դեռևս հստակ քաղաքականություն չունի, հստակ օրակարգ դեռևս չի ձևավորել: Tert.am-ի հետ զրույցում նման կարծիք հայտնեց քաղաքագետ Ստեփան Դանիելյանը:
Ըստ նրա՝ քաղաքական օրակարգի շրջանակում պետք է մշակվեն երկրի անվտանգության, զարգացման, արտաքին, ներքին և տնտեսական քաղաքականության հարցերը:
«Ե՛վ ՔՊ-ն, և՛ մյուս կուսակցությունները Հայաստանում, իմ տեսակետից, ձևավորված չեն: ՀՀԿ-ն եղել է իշխող խավի կոմպլոմերատ, մյուս կուսակցություններն ինչ-որ անձերին ենթակա կառույցներ են: Դրանք դասական առումով կուսակցություններ չեն: Մինչդեռ, կուսակցությունը լուրջ պետք է մշակի արտաքին, ներքին, տնտեսական քաղաքականությունները, կազմակերպի կոնֆերանսներ, դեբատներ: Այսինքն, այն, ինչը մենք քաղաքական օրակարգ ենք անվանում, կուսակցությունները տարբեր ինստիտուտների միջոցով ձևավորում են իրենց ապագա քաղաքականությունը բոլոր ոլորտներում և ներկայացնում են հանրությանը»,- նշեց նա:
Քաղաքագետի կարծիքով՝ կադրերի ընտրությունն ու կադրերի որակը արդեն պետք է բխեն համապատասխան օրակարգի խնդիրներից, որն, ընդհանուր առմամբ, բացակայում է. «Եթե չկա կառավարության գիծ, ապա, բնականաբար, կադրերն ընտրվում են տարերայնորեն, և նույն այդ կադրերն ինչ-որ առումով նույնպես տարերայնորեն են գործում»,- ասաց Ս. Դանիելյանը:
«Կադրերի դեպքում կա երկրորդ հարցը. եթե որևէ նախարար կամ փոխնախարար, որը «Քաղաքացիական պայմանագրի» անդամ է, ապա հանդես են գալիս որպես նախարա՞ր, թե՞ որպես ՔՊ անդամ: Նրանց հայտարարություններում այդ հստակությունը պետք է մտնի՝ իրենք որ դերում են հանդես գալիս՝ կուսակցական, թե կառավարության: Կառավարությունը միակուսակցական չէ, տարբեր կուսակցություններ կան: Շատ դեպքերում, երբ որ այդ մարդիկ խոսում են, հասկանալի չի լինում՝ իրենք որ դերում են հանդես գալիս, որը խճճում է իրավիճակը»,- նկատեց նա:
Ստեփան Դանիելյանն ընդգծում է, որ պետք է տարբերել կառավարությունը և «Քաղաքացիական պայմանագիր» կուսակցությունը: Ըստ նրա՝ կառավարությունը ժամանակավոր է և իր առջև ժամանակավոր խնդիրներ պետք է դնի, ինչն արվել է: Իսկ «Քաղաքացիական պայմանագիրը», որը ընտրություններում ձգտում է իշխանություն դառնալ, դեռևս քաղաքական օրակարգ չի ձևավորել:
«Ես չեմ ասում, որ կառավարությունը պետք է իր երկարաժամկետ օրակարգը հստակեցնի, որովհետև այս կառավարությունը տարբեր կուսակցություններից է կազմված, և այս կառավարությունն իսկապես ժամանակավոր է: Բնականաբար, նման կառավարությունը ժամանակավոր խնդիրներ պետք է իր առաջ դնի, բայց ՔՊ-ի դեպքում խնդիրն այլ է»,- ասաց նա:
Քաղաքագետը նաև անդրադարձավ վարչապետի՝ հանրաքվեների ինստիտուտը զարգացնելու մասին հայտարարությանը՝ նշելով սա շատ տարածված երևույթ է որոշ երկրներում, հատկապես Շվեյցարիայում: Ստեփան Դանիելյանը, սակայն, այս գաղափարի օրինականացման անհրաժեշտություն է տեսնում:
«Հիմա, եթե Նիկոլ Փաշինյանը, որպես գաղափարախոս ուղիղ ժողովրդավարական մեխանիզմների զարգացման է գնում, դա նորմալ է, բայց դա պետք է դրվի կուսակցության ծրագրերի հիմքում և ունենա որոշակի օրենքների տեսք: Սա պետք է լինի ոչ թե խոսքի, այլ փաստաթղթերի մակարդակով: Ուղիղ ժողովրդավարության ինստիտուտները պետք է մտնեն պետական կառավարման համակարգի մեջ: Հիմա, եթե հանրաքվեի ինստիտուտն օրենք չդառնա, չփաստաթղթավորվի, ուրեմն նշանակում է՝ սա իրավիճակային գաղափար է, իրավիճակից ելնելով նման գաղափարներ են առաջ տարվում: Հնարավոր է՝ ընտրություններից հետո խորհրդարանում ունենալով մեծամասնությունը՝ Ն. Փաշինյանն այլ ձևով խնդիրներին լուծում տա»,- նշեց Ս. Դանիելյանը: