ՆԱՍԱ-ն վերջին պահին հետաձգել է ամենաարագընթաց սարքի արձակումը դեպի Արև (լուսանկարներ)
ԱՄՆ Օդագնացության և տիեզերական տարածության հետազոտությունների ազգային գործակալությունը՝ ՆԱՍԱ-ն, վերջին պահին հետաձգել է դեպի Արև ուղարկվելու համար նախատեսված ամենաարագընթաց սարքի՝ Parker Solar Probe տիեզերանավի արձակումը:
Ինչպես հայտնում է The Guardian-ը, սարքի արձակումը չեղարկվել է մեկնարկից 1 րոպե 55 վայրկյան առաջ: Այն պետք է տիեզերք արձակվեր Ֆլորիդա նահանգից՝ Delta IV հրթիռի միջոցով: Սակայն հրթիռի հետ կապված խնդիրների պատճառով առաքելությունը չի իրագործվել:
ՆԱՍԱ-ի մասնագետները հայտնել են, որ 1.5 մլրդ դոլար արժողությամբ սարքը կարձակվի օգոստոսի 12-ին:
Հավելենք, որ Parker Solar Probe-ը կկարողանա երկնային լուսատուին մոտենալ աննախադեպ մոտ տարածության վրա:
Սովորական մեքենայի չափով սարքը կգտնվի Արևից 6.276.441 կմ հեռավորության վրա ու կկարողանա դիմանալ մինչև 1.400 աստիճան տաքությանը:
Այն Արևին կմոտենա միայն 2024թ.:
Գիտնականները հույս ունեն ուսումնասիրությունների արդյունքում պարզել, թե ինչու Արեգակի մթնոլորտի ամենավերջին շերտն ավելի տաք է, քան լուսատուի մակերևույթը:
Նշվում է, որ սարքն Արևի շուրջ կպտտվի 24 անգամ:
