Երբ մենք որոշել ենք արտագնա նիստ անցկանցել, որոշ գործիչներ քայլերթ էին իրականացնում Վանաձոր-Դիլիջան մայրուղում. Է. Շարմազանով
Կուսակցության խորհրդի նիստը կուսակցականների համար է, մենք իրականացրել ենք արտագնա նիստ և առաջին անգամ չէ, որ կուսակցությունը իրականացնում է արտագնա նիստեր: Այս մասին Tert.am-ի հետ զրույցում ասաց ՀՀ Ազգային ժողովի փոխնախագահ, «Հայաստանի Հանրապետական» կուսակցության խոսնակ Էդուարդ Շարմազանովը` անդրադառնալով այսօր Ծաղկաձորում տեղի է ունեցած ՀՀԿ գործադիր մարմնի և խորհրդի արտագնա նիստին, որտեղ Գործադիր մարմինը կուսակցության նախագահի առաջին տեղակալ Կարեն Կարապետյանի առաջարկությամբ որոշել է ՀՀ վարչապետի պաշտոնում ՀՀԿ խորհրդին ներկայացնել Հայաստանի Հանրապետական կուսակցության նախագահ Սերժ Սարգսյանի թեկնածությունը:
«Մեր պատմության ընթացքում բազում անգամներ եղել են արտագնա նիստեր և եթե որոշ մարդիկ կարծում են, որ վերջին պահին է որոշվել դա, պետք է հիասթափեցնեմ նրանց: Կուսակցությունը առնվազն մեկ շաբաթ առաջ արդեն հայտարարել էր իր կուսակիցներին, որ նիստը պետք է լինի արտագնա և երբ մենք դա որոշել ենք, այդ որոշ գործիչները քայլերթ էին իրականացնում Վանաձոր-Դիլիջան մայրուղում»,-ասաց նա և բացառեց, որ արտագնա նիստի որոշումը որևէ կերպ կապված է «Իմ քայլը» նախաձեռնության ակցիաների հետ:
Ինչ վերաբերում է ապրիլի 17-ին հանրահավաքի մասնակիցների կողմից Ազգային ժողովը շրջափակման պատրաստակամությանը, որտեղ հատուկ նիստով լինելու վարչապետի ընտրությունը, Էդուարդ Շարմազանովը պատասխանեց.«Որևէ անհանգստություն չունենք, մենք իրականացնում ենք մեր Սահմանադրական իրավունքը: Ապրիլի 17-ին հետո դրա մասին կխոսենք, կգնանք, կտեսնեք, շատ հանգիստ»:
Պատասխանելով հարցին` մտահոգությո՞ւն չի առաջացնում արդյոք, որ այդքան քաղաքացի իրենց բողոքի ձայն են բարձրաձայնում, Էդուարդ Շարմազանովը պատասխանեց.«Ես այդ հարցին, բազմաթիվ անգամ պատասխանել եմ. ՀՀ-ում իշխանությունները ձևավորվել են ընտրություններից հետո: Դա քաղաքացիների իրավունքն է, ՀՀ-ն ավտորիտար երկիր չէ, որտեղ բոլորը նույն կարծիքն ունենան, ընտրությունների միջոցով է որոշվում, թե ով լինի իշխանությունը և ով ընդդիմությունը: Ընտրությունները եղել են մեկ տարի առաջ Սահմանադրական իրավունքը մերն է` առաջադրելու վարչապետի թեկնածու և մենք պետք է իրականացենք մեր իրավունքը: Իսկ իմ հարգելի գործընկերները, ովքեր ուզում են, որ իրենք առաջարկեն, թե ով է իշխանություն, 2022 թվականին ընտրությունների միջոցով կարող են անել: Մինչև 2022 թվականը ՀՀ քաղաքացիները որոշել են, թե ով լինի իշխանություն և անկախ ձեր տված հարցերից, մեր գործընկերներին երթեր անցկացնելու իրավունքից, մեր կարծիքը չի փոխվի, մենք օգտվելու ենք մեր Սահմանադրական իրավունքից»: