Վաշինգտոնը ի ցույց է դնում, որ որևէ կերպ չի հաշտվում Սիրիայում Ռուսաստանի և Իրանի վարած քաղաքականության և առաջխաղացման հետ. արաբագետ
Արաբագետ Արաքս Փաշայանը Tert.am-ի հետ զրույցում նշեց, որ Սիրիայում ԱՄՆ-ի, Ֆրանսիայի և Մեծ Բրիտանիայի իրականացրած հրթիռակոծությունները սադրում են մի նոր լարվածություն, ինչը նշանակում է՝ Վաշինգտոնն ի ցույց է դնում, որ որևէ կերպ չի հաշտվում Սիրիայում Ռուսաստանի և Իրանի վարած քաղաքականության և առաջխաղացման հետ։
Նա նշեց, որ ռազմական գործողությունները, բնականաբար, ավելի կխորացնեն առճակատումը մի կողմից ԱՄՆ-ի և նրա դաշնակիցների, մյուս կողմից՝ Ռուսաստանի և նրա դաշնակիցների, այդ թվում՝ Իրանի միջև, մինչդեռ Մոսկվա-Թեհրան-Անկարա միջնորդությունների ու ջանքերի շնորհիվ հումանիտար իրավիճակը Սիրիայում զգալիորեն կարգավորվել էր։
Հիշեցնենք, որ Միացյալ նահանգները, Մեծ Բրիտանիան և Ֆրանսիան Սիրիայի օբյեկտների ուղղությամբ արձակել են ավելի քան 100 թևավոր «օդ-երկիր» դասի հրթիռ։
«Սիրիան այս պարագայում միջնորդավորված հարթակ է միջազգային հերթական լարվածության համար։ Սիրիայում վերջին տարիներին շարունակաբար բախվում են գերտերությունների ու տարածաշրջանային մեծ պետությունների, մասնավորապես՝ Սաուդյան Արաբիայի և Իսրայելի, մյուս կողմից՝ Իրանի, նաև Թուրքիայի շահերը։ Ռուսաստանը, նաև՝ ԱՄՆ-ը և Արևմուտքը լավագույնս օգտագործում են մերձավորարևելյան տարածաշրջանում գոյություն ունեցող ներքին հակասություններն ու մրցակցությունը՝ իրենց դիրքերն ամրապնդելու համար։ Ներկա փուլում Դամասկոսի նկատմամբ Վաշինգտոնի քաղաքականությունը վտանգում է ոչ միայն Սիրիայի, այլև տարածաշրջանի անվտանգությունը՝ մեծացնելով բռնության ծավալները։
Մասնավորապես, 2003 թ.-ին ԱՄՆ-ի կողմից Իրաքի գրավումից և հետագայում դրան հաջորդած «արաբական գարնան» դեպքերից հետո, որոնք, շատ դեպքերում, նույնպես ուղղորդվել են Վաշինգտոնի կողմից, Մերձավոր Արևելքի ազգային անվտանգության համակարգը, կարելի է ասել, փլուզվել է կամ հայտնվել փխրուն հավասարակշռության մեջ»,-ասաց Արաքս Փաշայանը։
Արաբագետը նշեց, որ ԱՄՆ-ի և նրա դաշնակիցների՝ ռազմական գործողությունները հնարավոր ընդլայնման դեպքում, ըստ ամենայնի, հակազդեցություն կստանան Սիրիայի դաշնակից պետությունների, մասնավորապես Մոսկվայի և Թեհրանի կողմից, սակայն, ավելի հավանական է, որ հետագա ռազմական առավել ընդլայնված զարգացումներ տեղի չունենան։ «Խնդիրն այն է, որ սուննիական ապստամբական վերջին հենակետերից մեկը՝ Արևելյան Ղուտան, որն աջակցություն էր ստանում Արևմուտքից և Սաուդյան Արաբիայից, ռուսական կողմի աջակցությամբ հանձնվեց։ Այս հանգամանքը, ինչպես նաև Ռուսաստանի և Իրանի վերջին շրջանի ռազմական հաղթանակները Սիրիայում դրդեցին ամերիկյան նոր վարչակարգին հերթական ագրեսիայի։ Դ․Թրամփի քաղաքական վարքագիծը, որը տարբերվում է ամերիկյան նախկին վարչակարգերի մերձավորարևելյան քաղաքականությունից, վտանգավոր է և հերթական անգամ ի հայտ է բերում այն հանգամանքը, որ միջազգային հարաբերություններում գոյություն չունեն զսպման մեխանիզմներ»,-ասաց նա:
Արաքս Փաշայանը նշեց, որ ներկա փուլի միջազգային հարաբերությունները հիշեցնում են Սառը պատերազմի շրջանը, երբ ԱՄՆ-ը ԽՍՀՄ-ի դեմ պատերազմում էր Աֆղանստանում՝ միջնորդավորված ձևով՝ օգտագործելով վահաբական գաղափարներով ներշնչված ջիհադական ռեսուրսը ճիշտ այնպես, ինչպես դա արեց Սիրիայում՝ վերստին անգամ Սաուդյան Արաբիայի օգնությամբ։
«Ներկա փուլում գերտերությունների միջև մրցակցությունը և լարվածությունը հարաճուն կերպով ընդլայնվում են, որից տուժում է սիրիական հասարակությունը, որն արդեն յոթ տարուց ավել է՝ իր վրա է զգում է պատերազմի ծանր հետևանքները։ Ինչպես 2003 թ․ Իրաքում ԱՄՆ-ի ներխուժումից առաջ այդպես էլ չհայտնաբերվեցին զանգվածային ոչնչացման զենքեր և այդպես էլ չապացուցվեց Սադդամ Հուսյենի կապը Ուսամա բին Լադենի հետ, կարծում եմ, որ Արևելյան Ղուտայում նույնպես հնարավոր չի լինելու ապացուցել սիրիական կառավարության կողմից քիմիական զենքի օգտագործման փաստը։ Հետաքրքիր է, որ մարդու իրավունքների և ժողովրդավարության համար պայքարող Վաշինգտոնը տարածաշրջանում իր ազդեցությունն ընդլայնելու համար վերջին տարիններին օգտագործում է նույն օրակարգերը»,-ասաց նա:
Ինչ վերաբերում է հակամարտության ազդեցությանը Հայաստանի վրա, Արաքս Փաշայանը նշեց․«Սիրիական պատերազմից մեծապես տուժում են մեր հայրենակիցները Սիրիայում, որոնք այդ երկրի քաղաքացիներն են։ Մյուս կողմից, Ռուսաստանի դեմ ուղղված պատժամիջոցների բացասական ազդեցությունը շոշափելի ձևով կզգացվի Հայաստանում»։