Այսօր վարորդն ավելի լարված է երթևեկում, մտածում է գիծ չտրորելու մասին. Տ. Քեյան
Վարորդը երթևեկում է համապատասխան նշաններ չլինելու պարագայում և տուգանվում է ճանապարհային նշաններին չհետևելու համար, Tert.am-ի հետ զրույցում ասաց «Վարորդի ընկեր» հկ նախագահ Տիգրան Քեյանը:
Նրա խոսքով՝ 2016 թվականից ուժի մեջ մտած «Վարչական իրավախախտումների վերաբերյալ ՀՀ օրենսգրքում փոփոխություններ և լրացումներ կատարելու մասին» օրենքով նախատեսված իրավակարգավորումներն այդքան էլ չեն թեթևացրել վարորդների տուգանքները, և ըստ էության դրական փոփոխությունները շատ քիչ են:
Նոր իրավակարգավորումը հնարավորություն է ստեղծում ամենաշատ տարածում ունեցող մի շարք իրավախախտումների համար կիրառել ոչ թե տուգանք, այլ նախազգուշացում, ինչպես օրինակ՝ կանգառ կատարելու կամ կայանելու կանոնները խախտելու դեպքում:
«Երեք պայման կար, որով նվազ նշանակության էր համարում կատարված խախտումը, եթե կայանելը չի գերազանցում մեկ րոպե ժամանակահատվածը,վարորդը չի իջել մեքենայից, խոչընդոտ չի հանդիսացել երթևեկության այլ մասնակիցների համար: Բայց ցանկացած վարորդ կանգնում էր, մեքենայից իջնում էր, հաշմանդամություն ունեցող մարդու էր իջեցնում կամ իրեր էր տեղափոխում մեքենայից, վարորդին տուգանում էին՝ ասում էին դու իջել ես: Կանգառի կայանման հարցով շատ դեպքերում քաղաքացիները մեկ րոպեն գերազանցել են, և անկախ նրանից՝ խոչընդոտ հանդիսացել են, թե չէ, միշտ նման տուգանքներ եկել է: Շատ քիչ վարորդներ էին նախազգուշացվում, հիմնականում տուգանվում էին, դրական փոփոխությունը շատ քիչ է»,-ասաց Քեյանը:
Տիգրան Քեյանի խոսքով՝ վարորդներից ավելի շատ դժգոհություններ են ստանում կապված գծանշումները հատելու հետևանքով եկած տուգանքների հետ:
«Շատ դժգոհում են, որ գծերը թեթևակի տրորում են, բայց ոչ վտանգ են ստեղծել, ոչ խոչընդոտ են ստեղծել երթևեկության հետ կապված, ու տուգանքներ են գալիս: Օրենքում հստակ նշված են այն դեպքերը, երբ անիվները ամբողջությամբ չեն հատել գծանշումները, իսկ ստացվում է, եթե անիվը չի հատել, ուրեմն խախտում չի արել տվյալ անձը, այսինքն՝ պետք է նախազգուշացնեն: Այսինքն՝ տվյալ օրենքը թերի է: Բոլորն էլ տուգանվել են, ովքեր գծանշումները հատել են, այդ մասով ընդհանրապես թեթևություն չի եղել: Ավելի լարված է այսօր վարորդը երթևեկում, մտածում է, որ պետք է ոչ թե երթևեկությանը նայի այլ գիծ չտրորելուն»,-ասաց նա:
Տիգրան Քեյանի խոսքով նախ պետք է համապատասխան կահավորանք ապահովել ավտոճանապարհներին, անհրաժեշտ ճանապարհային նշաններով, հետո պահանջել վարորդներից կարգապահ երթևեկություն:
«Երևան քաղաքում, եթե որևիցե խաչմերուկում փոխվում է երթևեկության կարգ, եթե տեսանկարահանող սարք եղավ, այդ փոփոխությունից հետո ահռելի շատանում է տուգանքների քանակը»,-ասաց Քեյանը:
Անդրադառնալով վարորդների բողոքներին, ըստ որոնց ամեն քայլափոխին տեղադրված են տեսանկարահանող սարքեր, Տիգրան Քեյանը նշեց, որ տեսախցիկները, եթե անվտանգություն ապահովեին, այլ ոչ թե միայն տուգանքներ առաջացնեին, վարորդներից դժգոհություններն ավելի քիչ կլինեին:
«Շատ խնդիրներ կան, երբ օրինակ տվյալ հատվածում խցանված է կամ վթար է, ոչ թե տեսանկարահանող սարքերի միջոցով է Ոստիկանությունը տեղեկանում, այլ լրատվական միջոցները կամ քաղաքացիներն են տեղյակ պահում: Եթե նման հարցեր էլ լուծեին տեսանկարահանող սարքերը, դժգոհությունները քիչ կլինեին: Ոստիկանության տարեկան վերլուծություններն էլ ցույց են տալիս, որ վթարների թիվը չի նվազում, դա նաև այլ գործոններով է պայմանավորված: Անկարգապահ վարորդը, անկախ նրանից՝ տեսանկարահանող սարք կա, թե ոչ, միշտ անկարգապահ է մնալու»,-ասաց նա: