Ռուսաստանն իր կամքով փոխում է մաքսային չափերը, ինքը խորտակվում է և իր հետ քաշում նաև ԵԱՏՄ անդամ երկրներին. Հովհաննես Իգիթյան
Ռուսաստանը վաղուց չի հարգում Առևտրի համաշխարհային կազմակերպության բոլոր նորմերը և իր կամքին համապատասխան փոխում է մաքսային չափերը, ստիպում ԵԱՏՄ անդամ երկրներին անել նույնը: Այս մասին Tert. am-ի հետ զրույցում նշեց Միջազգային հարցերով փորձագետ, ՀՀՇ վարչության անդամ Հովհաննես Իգիթյանը` անդրադառնալով Ռուսաստանի՝ Առևտրի համաշխարհային կազմակերպությունից դուրս գալու հնարավորությանը:
«Եթե Ռուսաստանը դուրս գա և չհարգի Առևտրի համաշխարհային կազմակերպության նորմերը, դա կազդի Հայաստանի վրա, քանի որ Հայաստանն իր առևտրի մեծ մասը կապում է Ռուսաստանի հետ: Էլ չեմ ասում, որ կա մի անդուր երևույթ, որ Ռուսաստանն իր քաղաքական քայլերի մեջ ներքաշում է նաև Հայաստանին, և երբ տեսնում ենք, թե ինչպես է Հայաստանը քվեարկում Ռուսաստանի դեմ քվեարկած որոշումներին, իհարկե, Հայաստանի շահերից դա չի բխում»,-ասաց նա:
Ըստ Հովհաննես Իգիթյանի` եթե այդ իլոզացիան շարունակվի, ապա ԵԱՏՄ-ն չի կարող պատշաճ ձևով գործել, որովհետև հնարավոր չէ գոնե տնտեսական առումով գոյություն ունենալ` չհարաբերվելով աշխարհի զարգացած շուկաների հետ:
«Այսինքն` միայն ներքին հարաբերություններով չես կարող միջազգային ասպարեզում զարգանալ, իսկ ԵԱՏՄ-ն գնալով թուլանալու է և քանդվելու է ներսից: Երկրորդ, իհարկե, Հայաստանը պետք է ավելի խիստ, օպտիմալ ձևով պաշտպանի իր շահերը, ինչպես անում են Բելառուսն ու Ղազախստանը:
Այնպես չէ, որ նրանք ամբողջությամբ ընդունում են այն պայմանները, որոնք թելադրում է Ռուսաստանը: Ցավոք, Հայաստանն այդ ուղղությամբ չի աշխատում»,-ասաց նա:
Դիտարկմանը՝ եթե Ձեր ներկայացրած սցենարով ուրվագծվի ԵԱՏՄ-ի ապագան, ապա որքանո՞վ է ՀՀ համար փրկօղակ հանդիսանում ՀՀ-ԵՄ համաձայնագիրը, միջազգային հարցերով փորձագետը պատասխանեց. «Հայաստան-ԵՄ վերջերս կնքված համաձայնագիրը GSP+-ի հնարավորությունը շատ լավ գործիք է Հայաստանի լրացուցիչ կամ այլընտրանքային զարգացումների համար, սակայն այստեղ շատ կարևոր է, որ այդ գործիքը օգտագործողներ լինեն, և այդ ուղղությամբ Հայաստանը աշխատի»,-ասաց նա:
Ըստ Իգիթյանի` պարզ է, որ հիմա խորտակվում է Ռուսաստանը` թե՛ քաղաքական, թե՛ տնտեսական տեսակետից, և արդեն իր հետ միասին քաշում է նաև ԵԱՏՄ անդամ երկրներին.
«Այստեղ մենք տեսնում ենք, թե ինչպես են Ղազախստանը և Բելառուսը փորձում փրկվել և փրկվում են»,-ասաց նա:
Հովհաննես Իգիթյանն օրինակ բերեց, որ Բելառուսը և Ղազախստանը արհամարհում են ՌԴ որոշումը և շարունակում են այն երկրների և կազմակերպությունների հետ աշխատել, որոնց վրա Ռուսաստանը պատժամիջոցներ է դրել:
Դիտարկմանը, թե պատժամիջոցների սկզբնական փուլում ևս գնահատվում էր, որ Ռուսաստանն անկում է ապրում, հիմա չե՞ք տեսնում, որ Ռուսաստանը ևս կարող է դիմադրողականություն ցուցաբերել և ներքին ուժի հաշվին դուրս գալ այս վիճակից, նա պատասխանեց. «Մի կերպ ապրել` չի նշանակում հաղթահարել այդ ճգնաժամերը: Դուք գնացեք խորքերի քաղաքները և նայեք` ինչպես են ապրում Ռուսաստանում խորքում գտնվող գյուղերը և քաղաքները, չէի ցանկանա Հայաստանում այդպիսի պայմաններ լինեն»,-ասաց նա:
Դիտարկմանը, թե Հայաստանից շարունակում են Ռուսաստան արտագաղթել, նա պատասխանեց, որ դա այլ հարց է և Ռուսաստանում հայերի համար գոնե պայմաններ կան առնվազն շինարարություններում աշխատել և գումարներ ստանալ: «Զարգացած երկրների կյանքի մակարդակը պետք է լինի մեր նշանակետը և այդ ուղղությամբ պետք է փորձենք Հայաստանը զարգացնել: Մեր զարգացման հեռանկարը Ռուսաստանի միջին քաղաքը կամ գյուղը չպետք է լինի»,-ասաց նա:
Անդրադառնալով Իրանում տեղի ունեցող զարգացումներին` Հովհաննես Իգիթյանն ասաց, որ Իրանի հետ կապված իրադարձությունները դեռևս լրիվ պարզ չեն. «Պարզ չէ`կա արդյոք արտաքին գործոն, որտեղից է այն գալիս: Այն, որ Իրանում կան սոցիալական խնդիրներ, պարզ է, բայց թե որքան դրանք կարող են ազդել պետության գլոբալ ցնցումների վրա, առայժմ չեմ կարող ասել: Իրանում ցանկացած անախորժություն, իհարկե, ազդելու է Հայաստանի վրա թե՛ քաղաքական, թե՛ ֆինանսական առումով»,-ասաց նա: