Տղայիս հիվանդ՝ ջերմությունով հոսպիտալից կրկին ուղարկեցին Մարտակերտ. ծնող
Վեց ամիս առաջ բանակ զորակոչված Նարեկ Սարգսյանը, ում հարազատները կասկածներ ունեն, որ նա մանկուց տառապում է «Երևանյան հիվանդությամբ», հոր պնդմամբ՝ օրերս ջերմությամբ ուղարկվել է զինծառայության՝ Մարտակերտ:
«Արձակուրդին եկավ տուն, որից հետո երեխան վատացավ, տարանք հոսպիտալ, որից հետ տաքությունով ամսի 9-ին ուղարկեցին Ստեփանակերտ՝ հոսպիտալ, որից հետո նորից ուղարկեցին չաստ»,-Tert.am-ին հայտնեց զորակոչիկի հայրը՝ Նորիկ Սարգսյանը:
Նրա խոսքով՝ որդին մանկությունից ցավեր և նշված հիվանդության ախտանիշներ է ունեցել, և միայն վերջերս մի բժիշկ կասկածել է, որ տղայի մոտ «Երևանյան հիվանդություն է», ինչից հետո որոշվել է անցկացնել տղայի գենետիկական անալիզ: Այն արվել է, նոպայի ժամանակ տղան ստացիոնար բուժում է ստացել «Արաբկիր» կենտրոնում, սակայն այստեղ չեն հաստատել պարբերական հիվանդության առկայությունը՝ առաջարկելով, որ հիվանդության ախտորոշմամբ զբաղվի զինկոմիսարիատի բժշկական հանձնաժողովը:
«Մենք տեղեկացրեցինք վայենկոմին, ասաց՝ հա, կզբաղվենք, բայց ոչ մի բանով էլ չզբաղվեցին: Մի անգամ անալիզ են արել, ուղարկել Գենետիկայի կենտրոն, որտեղից պատասխանը՝ ինքը ոչ լրիվ էդ հիվանդն ա։ Այսինքն՝ գրել էին «հիվանդի պատմածով», բայց իրենք նորմալ չհետազոտեցին երեխային, ասացին, որ պրիստուպ ունենաս, նոր անալիզ կանենք, որ իմանանք՝ քո մոտ էդ բանը կա, թե չկա։ Պրիստուպն էլ հո ամեն օր չի լինում, տարվա մեջ մի քանի անգամ, բայց իր մեջ էդ ցավը միշտ կա: Ու երեխային մրսել, քրտնել, ծանրություն ոչ մի բան չի կարելի , ֆիզզարյադկայից ուժասպառ է լինում, մի քանի անգամ ուշաթափվել է»,-շարունակեց պատմել զորակոչիկի հայրը: Նրա խոսքով՝ 6 ամսվա ծառայության ընթացքում որդին 3 ամիս պառկած է եղել հոսպիտալում:
Նարեկ Սարգսյանը բանակ է զորակոչվել Արաբկիրի զինվորական կոմիսարիատից:
3-րդ կարգի հաշմանդամ Նորիկը տղային բանակ չզորակոչելու հարցով դիմել է նաև Պաշտպանության նախարարություն: Այստեղ էլ վստահեցրել են, թե եթե երեխան հիվանդ է, բանակ չենք զորակոչի, բայց սրանք, ըստ Նորիկի, սոսկ խոսքեր են եղել: Ոչինչ չի արվել, և մեկ օր անց զանգել են, ասել, որ որդին պիտանի է ծառայության համար:
Tert.am-ի հետ զրույցում Պաշտպանության նախարարության մամուլի քարտուղար Արծրուն Հովհաննիսյանն ի պատասխան մեկնաբանություն ստանալու խնդրանքի խորհուրդ տվեց զանգահարել Պաշտպանության նախարարության թեժ գիծ:
Զինծառայողի հայրը Tert.am–ի հետ զրույցում ասաց, որ չի դիմել Թեժ գիծ՝ մինչ այդ Պաշտպանության նախարարությունից նորմալ պատասխաններ չստանալու պատճառով: Նա պատրաստվում է այդպես էլ անել ու դիմել, իսկ մինչ այդ նրա հետ կապ են հաստատել Մարդու իրավունքների պաշտպանից գրասենյակից՝ առաջարկելով՝ գալ և դիմում գրել։