Ի՞նչ եք ուզում Վիգեն Սարգսյանից. փոխանակ օգնենք, ընկել ենք էս տղու հետևից. Սեյրան Սարոյան (տեսանյութ)
ԱԺ ՀՀԿ խմբակցության պատգամավոր, գեներալ Սեյրան Սարոյանը տեղյակ չէ բանակում վիրավորված Ալբերտ Դալլաքյանի բուժման համար սկսված դրամահավաքից, որի նախաձեռնողը Պաշտպանության նախարար Վիգեն Սարգսյան է: Նա ԱԺ-ում լրագրողների հետ զրույցում ասաց, թե չի խոսի մի բանի մասին, որից տեղեկություն չունի:
«Ես դրանից խաբար չեմ, ինչի մասին չգտեմ, չեմ կարա խոսամ, բայց որ մոգոնում եք, թե ինչ եք ուզում Վիգեն Սարգսյանից` չեմ հասկանում: Մոգոնում եք, թե «Էմչեէսի» նախարարն է գալու պաշտպանության նախարար, հլը էդ երկուսին խառնում են իրար քիչ չի, մի հատ էլ ինձ վկա են բերում, ամոթ է, այդ բամբասանքները: Իմ անունը գրում եք, որ լավ կարդան, հո՞ խայտառակ չեք»,- ասաց Սարոյանը։
Պատգամավորն, արձագանքելով դիտարկմանը, որ նախարար Վիգեն Սարգսյանն ի պատասխանն քաղաքացու որակմանը, թե դրամահավաքը նոր բոշության ձև է, ասել էր՝ բոշան դու ես, ասաց. «Քաղաքացին ի՞նչ իրավունք ունի նախարարին ասի բոշա, մի հատ պաշտպանության նախարար ունենք, էն էլ չհարգե՞նք: Այս գրածը թուրքերն են կարդում, երեխեք ջան, ամոթ ա, մի հատ ժողովուրդ ասեք, որ իրա նախարարին բոշա անվանի, էդ երկիր ու բանակ եղա՞վ: 100 անգամ ասել եմ, խնդրել եմ ձեզի, որ եկեք բանակը հարգենք, թողեք տեսնենք` էս մարդը, որ նոր նշանակված նախարար է, ու մի տարի չկա` 7 տարվա ծրագիր է գրել, որ մեր բանակը պետք է հզորացնի: Փոխանակ սաղս օգնենք, հիմա ընկել ենք էս տղու հետևից, էնքան ենք անելու, մինչև զզվի, չաշխատի»:
Հարցին՝ Վիգեն Սարգսյանն իրեն իր պաշտոնում արդարացնո՞ւմ է, Սեյրան Սարոյանը պատասխանեց. «Օրինակ՝ տեսեք, որ 7 տարվա ծրագիրը դարձրեց քննարկման առարկա, ամբողջ ժողովրդին ծանոթացրեց, բոլորը քննարկեցին, սաղ հանձնաժողովները քննարկեցին, հիմա թողեք տեսնենք` էս մարդն ինչ է անում: Դեռ բան չարած` արդեն փնովում են, խայտառակում են, քար են շպրտում, ցեխ շպրտում, «Էմչեէս» ենք բանակի հետ կռվացնում, ամոթ ա չէ՞, անցել են խալխի յանից: Էն օրը լրագրողա, կնիկա, չգիտեմ, անեկտոդա գրել` դրել կաթողիկոսին ա խայտառակ անում, ինձ էլ էր խառնել էդ գործին: Լավ, պաշտպանության նախարարից չենք վախում, Վիգենից չենք վախում, ինձնից չենք վախում, գոնե Աստծուց վախեցեք»:
Դիտարկմանը, թե նախարարությունն արդեն առանձնացնում է պետություն-հասարակություն կապը, քանի որ նախարարի խոսնակ Արծրուն Հովհաննիսյանը գրել էր, որ պետության չափ ոչ-ոք օգուտ չի տվել բանակին, գեներալն արձագանքեց. «Պահ, էն էլ գիտնական է»:
Սեյրան Սարոյանը նկատեց, որ Վիգեն Սարգսյանը ԶՈւ զարգացման 7 տարվա ծրագիր է մշակել.«Վիգեն Սարգսյանը 7 տարի Պաշտպանության նախարար է, արդեն մարդը ծրագիրը գրել, նստել է վրեն, կօգնենք Վիգեն Սարգսյանին, որ մեր բանակը հզորանա, թուրքի հերն անիծենք»: